வெளிநாடுகளில் பணிபுரியும் இலங்கை தொழிலாளர்கள் தங்களது சொந்த வீட்டு கனவை நனவாக்கும் வகையில் ‘எதெர தியரிய’ (Ethera Diriya) விசேட வீட்டுக் கடன் திட்டம் இன்று (10) அதிகாரப்பூர்வமாக அறிமுகப்படுத்தப்படவுள்ளது.
திட்டத்தின் கீழ் தகுதியான வெளிநாட்டு தொழிலாளர்களுக்கு 5 இலட்சம் ரூபா முதல் அதிகபட்சம் 1 கோடி ரூபா ( 10 ரூபா மில்லியன்) வரை வீட்டுக் கடன் பெற்றுக்கொள்ள வாய்ப்பு வழங்கப்படுகிறது. கடனை திருப்பிச் செலுத்துவதற்கு 10 ஆண்டுகள் வரை கால அவகாசம் வழங்கப்படும்.
திட்டத்தின் முக்கிய சிறப்பம்சமாக, கடனுக்கான வட்டியின் ஒரு பகுதியை இலங்கை வெளிநாட்டு வேலைவாய்ப்பு பணியகம் (SLBFE) அரசாங்கத்தின் சார்பில் ஈடுசெய்யும் முறை அறிமுகப்படுத்தப்பட்டுள்ளது.
இதன் மூலம் வெளிநாடுகளில் உழைத்து இலங்கைக்கு பணம் அனுப்பும் தொழிலாளர்கள், தங்களது வருமானத்தை நீண்டகால சொத்து மற்றும் வீட்டு முதலீடாக மாற்றிக்கொள்ள உதவும் நோக்கம் கொண்டுள்ளது.
திட்டத்தில் பங்கேற்கும் அரச மற்றும் தனியார் வங்கிகள் மூலம் தகுதியான வெளிநாட்டு தொழிலாளர்கள் விண்ணப்பிக்க முடியும்.
விண்ணப்பதாரரின் கடனைத் திருப்பிச் செலுத்தும் திறன், கடன் நம்பகத்தன்மை மற்றும் தேவையான அடமானம் உள்ளிட்ட விடயங்களை வங்கிகள் முதற்கட்டமாக மதிப்பீடு செய்யும். பின்னர், வெளிநாட்டு வேலைவாய்ப்பு பதிவு மற்றும் வங்கி வழியாக அனுப்பப்பட்டுள்ள வெளிநாட்டுப் பணப்பரிமாற்றங்கள் உள்ளிட்ட தகுதிகள் SLBFE மூலம் சரிபார்க்கப்படும்.
ஏற்கனவே Union Bank உள்ளிட்ட வங்கிகள் SLBFE உடன் இந்தத் திட்டத்தை முன்னெடுப்பதற்கான புரிந்துணர்வு ஒப்பந்தங்களில் கையெழுத்திட்டுள்ளன.
வெளிநாடுகளில் பல ஆண்டுகளாக உழைத்து நாட்டிற்கு அந்நியச் செலாவணியை ஈட்டித் தரும் இலங்கை தொழிலாளர்களுக்கு, அவர்களின் வருமானத்தை சொந்த வீடு என்ற நீண்டகால சொத்தாக மாற்றுவதற்கான புதிய வாய்ப்பாக இந்தத் திட்டம் அமையுமென எதிர்பார்க்கப்படுகிறது.
