பஸ்களில் திருத்தப்பட்ட கட்டணங்களைப் பொதுமக்களுக்குக் காண்பிப்பது கட்டாயமென மேல் மாகாண வீதிப் பயணிகள் போக்குவரத்து அதிகாரசபை தெரிவித்துள்ளது.
அனுமதிப்பத்திர நிபந்தனைகளின் கீழ் இது கட்டாயம் மேற்கொள்ளப்பட வேண்டுமென அறிவிக்கப்பட்டுள்ளது.
இவ்வாறு கட்டணப் பட்டியலைக் காட்சிப்படுத்தாத பஸ்களின் அனுமதிப்பத்திரங்கள் ரத்து செய்யப்படும் அல்லது அபராதம் விதிக்கப்படும் என எச்சரிக்கை விடுக்கப்பட்டுள்ளது.
சர்வதேச சந்தையில் எரிபொருளுக்கு ஏற்பட்டுள்ள விலையதிகரிப்புக்கமைய இலங்கையிலும், விலையதிகரிக்கப்பட்ட நிலையில், இலங்கையில் பல்வேறு துறைகளும் பாதிக்கப்பட்டுள்ளன.
அதற்கமைய அண்மையில் பஸ் கட்டணங்கள் அதிகரிக்கப்பட்டபோதிலும், அது தொடர்பில் பொதுமக்களுக்கு போதிய தெளிவூட்டல்கள் கிடைக்கப்பெறவில்லை. எனவே வீண் அசௌகரியங்களை தவிர்த்துக்கொள்ளும் நோக்கில், பஸ்களில் திருத்தப்பட்ட பஸ் கட்டணத்தை காட்சிப்படுத்துமாறு அறிவுறுத்தல்கள் வழங்கப்பட்டுள்ளன.









