போதைக்கு எதிரான சமூகக் கருத்தை மையமாகக் கொண்டு உருவாகியுள்ள தென்னிந்தியத் தமிழ் திரைப்படமான ‘நல்லபடம்’ திரைப்படத்தின் இசை வெளியீட்டு விழா இலங்கையில் பிரமாண்டமாக நடைபெற்றது.
இதனைத் தொடர்ந்து, ‘நல்லபடம்’ திரைப்படத்தின் இசை இருவட்டை இலங்கையின் கடற்றொழில், நீரியல் மற்றும் கடல் வளங்கள் அமைச்சர் ராமலிங்கம் சந்திரசேகரன் அவர்கள் தனது அமைச்சு அலுவலகத்தில் வைத்து உத்தியோகபூர்வமாக வெளியிட்டு வைத்தார்.
நிகழ்வில் திரைப்படத்தின் பாடல்களை ரசித்த அமைச்சர் ராமலிங்கம் சந்திரசேகரன், பாடல்களையும் திரைப்படக் குழுவினரின் முயற்சிகளையும் பாராட்டியதுடன், திரைப்படத்தின் வெற்றிக்கும் படக்குழுவினருக்கும் தனது வாழ்த்துகளைத் தெரிவித்தார்.
இந்தச் சிறப்பு நிகழ்வில் இலங்கையின் பிரபல கவிஞரும் தமிழ்சினிமா பாடலாசிரியருமான ‘அய்யோ சாமி’ பாடல் புகழ் பொத்துவில் அஸ்மின், ‘நல்லபடம்’ திரைப்படத்தின் கதாநாயகன் டாக்டர் ஏ. ஹரிஷ் மற்றும் படக்குழுவினர் கலந்து கொண்டனர்.
ஹரிஷ் சினிமாஸ் சார்பில் ஏ. அழகு பாண்டியன் தயாரித்துள்ள ‘நல்லபடம்’ திரைப்படத்தில் டாக்டர் ஏ. ஹரிஷ் கதாநாயகனாகவும், தனலட்சுமி கதாநாயகியாகவும் நடித்துள்ளனர். இவர்களுடன் மொட்டை ராஜேந்திரன், கல்கி ராஜா, ரமா, பிரியதர்ஷினி ராஜ்குமார் உள்ளிட்ட பலர் முக்கிய கதாபாத்திரங்களில் நடித்துள்ளனர்.
இத்திரைப்படத்தை ‘கெட்டவன்னு பேரெடுத்த நல்லவன்டா’ திரைப்படத்தை இயக்கிய இயக்குநர் சி. பிரபுராம் இயக்கியுள்ளார்.
‘நல்லபடம்’ திரைப்படத்திற்கு சகிஷ்னா சேவியர் இசையமைத்துள்ளார். திரைப்படத்தின் பாடல் வரிகளை இலங்கையைச் சேர்ந்த பிரபல கவிஞரும் தமிழ்சினிமா பாடலாசிரியருமான பொத்துவில் அஸ்மின் எழுதியுள்ளார்.
திரைப்படத்தில் இடம்பெறும் பாடல்களுக்கு வேல்முருகன், அருள் பிரகாஷம், புண்ணியா செல்வா, காயத்ரி ராஜீவ் மற்றும் சஷாங் ஆகியோர் குரல் வழங்கியுள்ளனர்.
திரைப்படத்தின் இசை வெளியீட்டைத் தொடர்ந்து பாடல்களுக்கு ரசிகர்கள் மத்தியில் சிறப்பான வரவேற்பு கிடைத்து வருவதாக படக்குழுவினர் தெரிவித்துள்ளனர்.
