எதிர்வரும் ஏப்ரல் மாத தமிழ், சிங்கள புத்தாண்டுக்கு முன்னர் நாட்டின் 25 மாவட்டங்களிலும் சாரதி அனுமதிபத்திரங்களை ஒன்லைன் ஊடாக வழங்க நடவடிக்கை எடுக்கப்படுமென மோட்டார் போக்குவரத்து ஆணையாளர் நாயகம் கமல் அமரசிங்க தெரிவித்துள்ளார்.
குறித்த சேவை தற்போது 11 மாவட்டங்களில் ஒன்லைனில் செயல்பட்டுவருவதாகவும், எஞ்சிய மாவட்டங்களிலும் சாரதி அனுமதிபத்திரங்களை ஒன்லைனில் வழங்குவதற்கான செயற்பாடுகள் ,தற்போது நடைபெற்று வருவதாகவும் அவர் குறிப்பிட்டுள்ளார்.
சகல மாவட்டங்களிலும் சாரதி அனுமதிபத்திரங்களை ஒன்லைனில் வழங்குவதன் மூலம், ஒரு மாதத்திற்குள் சாரதி அனுமதிபத்திரங்களை பெற்றுக்கொள்ளும் நடைமுறை இலகுபடுத்தப்படுமெனவும் மோட்டார் போக்குவரத்து ஆணையாளர் நாயகம் சுட்டிக்காட்டியுள்ளார்.
இந்நிலையில் கடந்த ஆண்டு, சாரதி அனுமதிபத்திரங்களை அச்சிடுவதற்காக தனியார் நிறுவனமொன்றுக்கு 184 மில்லியன் ரூபாய் செலுத்தப்பட்டது.
இவ்வாண்டு 28 மில்லியன் ரூபாய் செலவில் புதிய நிறுவனம் மூலம் சேவையைப் பெற்றுக்கொள்ள எதிர்பார்ப்பதாகவும், மோட்டார் போக்குவரத்து திணைக்களத்திற்கு அச்சிடும் இயந்திரங்களை கொள்வனவு செய்து திணைக்களம் ஊடாக சாரதி அனுமதிபத்திரங்களை அச்சிடவும் நடவடிக்கை எடுக்கப்படுமெனவும்மோட்டார் போக்குவரத்து ஆணையாளர் நாயகம் கமல் அமரசிங்க மேலும் தெரிவித்துள்ளார்.









