மலேசியாவிலிருந்து கட்டுநாயக்க சர்வதேச விமான நிலையத்திற்கு வருகை தந்த மூன்று இலங்கைப் பயணிகளிடமிருந்து ரூ.13 கோடியே 4 இலட்சத்து 80 ஆயிரம் பெறுமதியான ‘குஷ்’ ரக கஞ்சா போதைப்பொருள் கைப்பற்றப்பட்டுள்ளது.
சம்பவம் தொடர்பில் மூன்று சந்தேகநபர்கள் கைது செய்யப்பட்டுள்ளனர்.
மாத்தளையைச் சேர்ந்த தொழில்நுட்பவியலாளர் கைது
இன்று (16) அதிகாலை மலேசியன் எயார்லைன்ஸ் நிறுவனத்திற்குச் சொந்தமான MH-179 விமானத்தில் இலங்கை வந்த மாத்தளையைச் சேர்ந்த 30 வயதுடைய தொழில்நுட்பவியலாளர் ஒருவர், விமான நிலையத்தின் Green Channel ஊடாக போதைப்பொருளைக் கடத்த முயன்றபோது சுங்க அதிகாரிகளால் கைது செய்யப்பட்டுள்ளார்.
சந்தேகநபரின் இரண்டு பயணப் பொதிகளுக்குள் இருந்த மதுபானப் பெட்டிகளில் மறைத்து வைக்கப்பட்டிருந்த ஐந்து பொதிகளில் இருந்து 4.384 கிலோகிராம் ‘குஷ்’ போதைப்பொருள் மீட்கப்பட்டுள்ளது.
இதன் சந்தை பெறுமதி ரூ.4 கோடியே 38 இலட்சத்து 40 ஆயிரம் என மதிப்பிடப்பட்டுள்ளது.
மேலும் இருவர் கைது
இதே விமானத்தில் பயணித்த நெடுங்கேணியைச் சேர்ந்த 35 வயதுடைய உருக்கு ஒட்டும் தொழிலாளி ஒருவரும், கண்டியைச் சேர்ந்த 46 வயதுடைய வர்த்தகர் ஒருவரும் பொலிஸ் போதைப்பொருள் ஒழிப்புப் பிரிவினரால் கைது செய்யப்பட்டுள்ளனர்.
இவர்களது இரண்டு பயணப் பொதிகளுக்குள் இருந்த மதுபானப் பெட்டிகளில் நான்கு பொதிகளாக மறைத்து வைக்கப்பட்டிருந்த 8.664 கிலோகிராம் ‘குஷ்’ போதைப்பொருள் கைப்பற்றப்பட்டுள்ளது.
இதன் சந்தைப் பெறுமதி ரூ.8 கோடியே 66 இலட்சத்து 40 ஆயிரம் எனத் தெரிவிக்கப்பட்டுள்ளது.
தாய்லாந்திலிருந்து கடத்தல்
கைது செய்யப்பட்ட மூவரும் தாய்லாந்தில் போதைப்பொருளைக் கொள்வனவு செய்து, அங்கிருந்து மலேசியாவின் கோலாலம்பூர் நகருக்குச் சென்று, பின்னர் இலங்கைக்குக் கடத்தி வந்துள்ளதாக ஆரம்பகட்ட விசாரணைகளில் தெரியவந்துள்ளது.
கைது செய்யப்பட்ட சந்தேகநபர்கள் நீர்கொழும்பு நீதவான் நீதிமன்றத்தில் ஆஜர்படுத்தப்பட்டு, தடுப்புக் காவல் உத்தரவு பெறப்பட்டுள்ளதுடன், மேலதிக விசாரணைகள் முன்னெடுக்கப்படவுள்ளன.









