உலகளாவிய ரீதியில் மைக்ரோசொப்ட் நிறுவனத்தின் பல்வேறு இணையச் சேவைகளில் ஏற்பட்ட பாரிய தொழில்நுட்பக் கோளாறு காரணமாக மில்லியன் கணக்கான பயனர்கள் பாதிக்கப்பட்டுள்ளனர்.
நேற்று முதல் ஏற்பட்ட இந்தத் தடங்கலால் Outlook, Microsoft Teams மற்றும் Microsoft 365 உள்ளிட்ட முக்கிய சேவைகளைப் பயன்படுத்துவதில் பயனர்கள் சிரமங்களை எதிர்கொண்டுள்ளனர்.
அமெரிக்கா, ஐரோப்பா, ஆசியா உள்ளிட்ட பல்வேறு பிராந்தியங்களில் 74க்கும் மேற்பட்ட நாடுகள் மற்றும் பிரதேசங்களில் இப்பாதிப்பு தொடர்பான முறைப்பாடுகள் பதிவாகியுள்ளன.
குறிப்பாக, அலுவலக மின்னஞ்சல் பரிமாற்றம், இணையவழிக் கூட்டங்கள் மற்றும் நிறுவனங்களுக்கிடையிலான தொடர்பாடல்கள் பாதிக்கப்பட்டுள்ளதாகத் தெரிவிக்கப்படுகிறது.
சேவையகக் கட்டமைப்பில் ஏற்பட்ட தொழில்நுட்பக் கோளாறே இந்தத் தடங்கலுக்குக் காரணமாக இருக்கலாம் என ஆரம்பகட்ட தகவல்கள் தெரிவிக்கின்றன.
எனினும், சைபர் தாக்குதல் காரணமாக இந்தப் பாதிப்பு ஏற்பட்டதற்கான உறுதியான ஆதாரங்கள் இதுவரை வெளியாகவில்லை.
இந்நிலையில், பாதிக்கப்பட்ட சேவைகளை வழமைக்குக் கொண்டுவருவதற்கான நடவடிக்கைகளை மைக்ரோசொஃப்ட் நிறுவனம் முன்னெடுத்து வருகின்றது.
உலகளாவிய அலுவலகங்கள் மற்றும் வர்த்தக நிறுவனங்கள் மைக்ரோசொஃப்ட் சேவைகளை அதிகளவில் நம்பியுள்ள நிலையில், இந்தத் தொழில்நுட்ப முடக்கம் சர்வதேச ரீதியில் கவனத்தைப் பெற்றுள்ளது.









