உலக கால்பந்து ரசிகர்களுக்கு அதிர்ச்சியளிக்கும் அறிவிப்பை வெளியிட்டுள்ளார் போர்த்துக்கல் அணியின் நட்சத்திர வீரர் கிறிஸ்டியானோ ரொனால்டோ.
41 வயதான ரொனால்டோ, சர்வதேச கால்பந்து போட்டிகளில் இருந்து ஓய்வு பெறுவதாக இன்று (05) தனது சமூக வலைத்தளத்தில் வெளியிட்ட உணர்ச்சிபூர்வமான காணொளி மூலம் அறிவித்துள்ளார்.
இதன்படி, எதிர்வரும் நவம்பர் மாத சர்வதேசப் போட்டிகள் நிறைவடைந்த பின்னர் போர்த்துக்கல் தேசிய அணிக்காக விளையாடுவதை அவர் நிறுத்தவுள்ளார்.
“போர்த்துக்கல் மக்களே! நமது தேசிய அணியின் 7ஆம் இலக்க ஜெர்சியைத் திருப்பிக் கையளிக்கும் நேரம் வந்துவிட்டது. அந்த ஜெர்சி எனக்கு மட்டுமே சொந்தமானது என நான் ஒருபோதும் நினைத்ததில்லை. ஆனால், கடந்த 23 ஆண்டுகளாக அதனை அணியும் பாக்கியமும் பொறுப்பும் எனக்குக் கிடைத்தது” என தனது பிரியாவிடை காணொளியில் தெரிவித்துள்ளார்.
மேலும், இது எளிதான முடிவல்ல என்றும், சில முடிவுகள் மனதால் மட்டுமன்றி இதயத்தாலும் எடுக்கப்படுவதாகவும் அவர் குறிப்பிட்டுள்ளார்.
ரொனால்டோவின் வரலாற்றுச் சாதனைகள்
சர்வதேச கால்பந்து வாழ்க்கையில் போர்த்துக்கல் அணிக்காக 234 போட்டிகளில் விளையாடியுள்ள அவர் 146 கோல்களைப் பதிவு செய்துள்ளார்.
இதன் மூலம் ஆண்கள் சர்வதேச கால்பந்து வரலாற்றில் அதிக போட்டிகளில் விளையாடியவர் மற்றும் அதிக கோல்கள் அடித்தவர் என்ற உலக சாதனைகளைத் தன்வசம் வைத்துள்ளார்.
அத்துடன் ஐந்து முறை பலோன் டி ஓர் விருதையும் வென்றுள்ளார்.
2016ஆம் ஆண்டு ஐரோப்பிய கால்பந்து சம்பியன்ஷிப் மற்றும் 2019, 2025ஆம் ஆண்டுகளில் UEFA Nations League கிண்ணங்களை வென்ற போர்த்துக்கல் அணியின் வெற்றிப் பயணத்திலும் அவர் முக்கிய பங்காற்றியுள்ளார்.
பயிற்சியாளருடனான முரண்பாடும் இறுதிக்கட்ட சர்ச்சையும்
போர்த்துக்கல் அணியின் பயிற்சியாளர் ஜோர்ஜ் ஜீசஸ் உடனான கருத்து முரண்பாடுகள் மற்றும் அணியிலிருந்து விலகிய சம்பவம் உள்ளிட்ட சர்ச்சைகளுக்குப் பின்னணியில் இந்த ஓய்வு அறிவிப்பு வெளியாகியுள்ளது.
எனினும், தனது 23 ஆண்டுகால சர்வதேசப் பயணத்தில் ஆதரவளித்த ரசிகர்கள், குடும்பத்தினர், சக வீரர்கள் மற்றும் பயிற்சியாளர்களுக்கு ரொனால்டோ நன்றி தெரிவித்துள்ளார்.
ஒரு வீரரின் ஓய்வு மட்டுமல்ல… உலக கால்பந்து வரலாற்றில் தனி அத்தியாயம் படைத்த 7ஆம் இலக்க ஜெர்சியின் 23 ஆண்டுகால சர்வதேசப் பயணத்தின் நிறைவாகவும் இது அமைந்துள்ளது.









