ஸ்பைடர் மேன் திரைப்படங்கள் மூலம் உலகப் புகழ்பெற்ற ஹாலிவுட் நடிகர் டோபி மாகுயர், தனது முன்னாள் மனைவியின் மறுமணத்தை முன்னின்று நடத்தி வைத்துள்ள சம்பவம் இணையத்தில் பெரும் கவனத்தை ஈர்த்துள்ளது.
டோபி மாகுயரின் முன்னாள் மனைவியும், பிரபல நகை வடிவமைப்பாளருமான ஜெனிஃபர் மேயர், இசைத்துறை நிர்வாகியான ஜெஃப் ஒகுன்லேசியை திருமணம் செய்துகொண்டார்.
இந்தத் திருமணம் கடந்த ஒக்டோபர் 10ஆம் திகதி அமெரிக்காவின் ஹவாய் தீவில் உள்ள ஆடம்பர விடுதியில் நடைபெற்றுள்ளது.
இந்தத் திருமணத்தின் சிறப்பம்சம் என்னவென்றால், மணமகளின் முன்னாள் கணவரான டோபி மாகுயரே திருமண நிகழ்வை முன்னின்று நடத்தி வைத்துள்ளார்.
கடந்த 2016ஆம் ஆண்டு டோபி மாகுயரும் ஜெனிஃபர் மேயரும் பிரிந்தனர். சுமார் பத்தாண்டுகளாகப் பிரிந்து வாழ்ந்துவந்த நிலையில், கடந்த செப்டெம்பர் 21ஆம் திகதி அவர்களின் விவாகரத்து அதிகாரபூர்வமாக நிறைவடைந்ததாக ஊடகங்கள் தெரிவிக்கின்றன.
விவாகரத்து நிறைவடைந்த சில வாரங்களிலேயே ஜெனிஃபர் மேயர் மறுமணம் செய்துகொண்டுள்ளமை பலரையும் ஆச்சரியத்தில் ஆழ்த்தியுள்ளது.
இருப்பினும், பிரிவுக்குப் பின்னரும் டோபி மாகுயரும் ஜெனிஃபர் மேயரும் நட்புறவைப் பேணி வந்துள்ளனர். இவர்களுக்கு இரண்டு பிள்ளைகள் உள்ளதுடன், அவர்களை இருவரும் இணைந்து வளர்த்து வருகின்றனர்.
இந்தத் திருமண நிகழ்வில் ஹாலிவுட் நடிகர் லியோனார்டோ டிகாப்ரியோ, அமேசான் நிறுவனர் ஜெஃப் பெசோஸ் உள்ளிட்ட பல பிரபலங்களும் கலந்துகொண்டதாகத் தெரிவிக்கப்படுகிறது.
திருமண நிகழ்வின்போது டோபி மாகுயர் மணமக்கள் அருகில் நின்று திருமணத்தை நடத்தி வைத்த புகைப்படங்கள் சமூக வலைத்தளங்களில் வேகமாகப் பரவி வருகின்றன.
பிரிவுக்குப் பின்னரும் நட்புறவைப் பேண முடியுமா என்ற விவாதத்தையும் இந்தச் சம்பவம் இணையத்தில் ஏற்படுத்தியுள்ளது.
தனிப்பட்ட உறவுகள் முடிவடைந்த பின்னரும் பரஸ்பர மரியாதையுடன் நடந்துகொள்ள முடியும் என்பதை இந்த நிகழ்வு எடுத்துக்காட்டுவதாகப் பலரும் கருத்துகளைப் பகிர்ந்து வருகின்றனர்.









