திருக்குறளை இந்தியாவின் தேசிய நூலாக மத்திய அரசு உத்தியோகபூர்வமாக அறிவிக்க வேண்டும் என கவிஞர் வைரமுத்து இந்திய பிரதமர் நரேந்திர மோடிக்கு வேண்டுகோள் விடுத்துள்ளார்.
தாம்பரத்தில் நடைபெற்ற நிகழ்வொன்றில் கலந்துகொண்டு உரையாற்றிய வைரமுத்து, சர்வதேச அரங்கிலும் பிற நாட்டுத் தலைவர்களுடனான சந்திப்புகளின்போதும் திருக்குறளின் சிறப்புகளை பிரதமர் நரேந்திர மோடி எடுத்துரைத்து வருவதற்கு பாராட்டு தெரிவித்தார்.
ரஷ்ய ஜனாதிபதி விளாடிமிர் புடினுடனான சந்திப்பின்போது பிரதமர் மோடி, திருக்குறளின் ரஷ்ய மொழிபெயர்ப்பு நூலை பரிசாக வழங்கிய சம்பவத்தையும் அவர் சுட்டிக்காட்டினார்.
குறிப்பிட்ட சாதி, மதம் அல்லது மொழிக்கு அப்பாற்பட்டு, மனிதகுலம் முழுமைக்கும் பொதுவான வாழ்வியல் மற்றும் தத்துவக் கருத்துகளை திருக்குறள் எடுத்துரைப்பதாக வைரமுத்து குறிப்பிட்டார்.
திருக்குறளின் மதச்சார்பற்ற தன்மையும் உலகளாவிய மானுட விழுமியங்களும் கருத்தில் கொள்ளப்பட்டு, அதற்கு இந்தியாவின் தேசிய நூல் அந்தஸ்து வழங்கப்பட வேண்டும் என அவர் வலியுறுத்தினார்.
மேலும், திருக்குறளுக்கு தேசிய நூல் அந்தஸ்து வழங்கப்பட்டால், அதனை வரவேற்று பிரதமர் நரேந்திர மோடியை நேரில் சந்தித்து பாராட்ட உள்ளதாகவும் வைரமுத்து தெரிவித்தார்.
திருக்குறளுக்கு தேசிய நூல் அந்தஸ்து வழங்கப்படுவது தமிழ் மொழிக்கும் இந்திய கலாசாரத்திற்கும் சர்வதேச அளவில் பெருமையை ஏற்படுத்தும் என்றும் அவர் குறிப்பிட்டார்.
