தோட்டப்புற பாடசாலைகளை அபிவிருத்தி செய்வது அரசாங்கத்தின் பிரதான கல்வி இலக்குகளில் ஒன்றாகும் என பிரதமர் ஹரிணி அமரசூரிய தெரிவித்துள்ளார்.
தோட்டப் பகுதிகளைச் சேர்ந்த தமிழ் மொழிமூல ஆசிரியர்களை அதிகளவில் கல்விச் சேவையில் இணைத்துக்கொள்வதற்கான திட்டமொன்றும் தயாரிக்கப்பட்டுள்ளதாக பிரதமர் குறிப்பிட்டுள்ளார்.
இதற்காக தோட்டப் பகுதிகளைச் சார்ந்த ஆசிரியர் கலாசாலைகள் மேலும் அபிவிருத்தி செய்யப்பட வேண்டியதன் அவசியத்தையும் அவர் வலியுறுத்தியுள்ளார்.
குறிப்பாக, கொட்டகலை ஆசிரியர் கலாசாலையை கட்டியெழுப்புவது இந்நடவடிக்கையின் முதன்மை நோக்கமாகும் என பிரதமர் தெரிவித்துள்ளார்.
செப்டம்பர் 17ஆம் திகதி, கல்வி நிர்வாக சேவை அதிகாரிகளுக்காக இலங்கை பரீட்சைத் திணைக்களத்தில் நடத்தப்பட்ட தோட்டப்புற பாடசாலைகள் அபிவிருத்திப் பட்டறையில் கலந்துகொண்டு உரையாற்றிய போதே பிரதமர் ஹரிணி அமரசூரிய இந்தக் கருத்துக்களை வெளியிட்டுள்ளார்.
தோட்டப்புற பாடசாலைகளில் கல்வி வசதிகளை மேம்படுத்துவதுடன், அப்பகுதிகளில் காணப்படும் ஆசிரியர் வளத் தேவையை பூர்த்தி செய்வதற்கும் அரசாங்கம் கவனம் செலுத்தி வருவதாக அவர் தெரிவித்துள்ளார்.
மேலும், தோட்டப் பகுதிகளைச் சேர்ந்த இளைஞர்களுக்கு ஆசிரியர் பயிற்சிக்கான வாய்ப்புகளை அதிகரிப்பதன் மூலம், எதிர்காலத்தில் தமிழ் மொழிமூல ஆசிரியர் வளத்தை வலுப்படுத்துவதற்கும், தோட்டப்புற மாணவர்களுக்கு தரமான கல்வியை வழங்குவதற்கும் நடவடிக்கை எடுக்கப்படவுள்ளதாக பிரதமர் குறிப்பிட்டுள்ளார்.
கொட்டகலை ஆசிரியர் கலாசாலையின் அபிவிருத்தி உள்ளிட்ட நடவடிக்கைகள் மூலம், தோட்டப்புற கல்வித் துறையில் நீண்டகால மாற்றத்தை ஏற்படுத்துவது அரசாங்கத்தின் நோக்கமாக இருப்பதாகவும் பிரதமர் ஹரிணி அமரசூரிய தெரிவித்துள்ளார்.
