அக்கரைப்பற்று – கல்முனை பிரதான வீதியின் நிந்தவூர் பொலிஸ் பிரிவுக்குட்பட்ட மாட்டுப்பள்ளை பகுதியில் இடம்பெற்ற மோட்டார் சைக்கிள் விபத்தில், தென்கிழக்குப் பல்கலைக்கழகத்தில் கல்வி பயிலும் 26 வயதுடைய திருமணமான மாணவி ஒருவர் உயிரிழந்துள்ளார்.
மோட்டார் சைக்கிளின் பின்புற இருக்கையில் அமர்ந்திருந்த மாணவியின் ஆடை, எதிர்பாராத விதமாக பின்சக்கரத்தில் சிக்கியதையடுத்து, மோட்டார் சைக்கிள் கட்டுப்பாட்டை இழந்து விபத்துக்குள்ளானதில் மாணவி உயிரிழந்துள்ளதாக ஆரம்பகட்ட விசாரணைகளில் தெரியவந்துள்ளது.
நிந்தவூர் 9ஆம் பிரிவு, மையவாடி வீதியைச் சேர்ந்த பக்கீர் முகைதீர் பிஸ்மி பாத்திமா என்ற மாணவியே இவ்வாறு உயிரிழந்துள்ளார்.
நேற்று மாலை இடம்பெற்ற இந்தச் சம்பவத்தின்போது, அவர் தனது தந்தையுடன் மோட்டார் சைக்கிளில் பயணித்துள்ளார்.
பல்கலைக்கழக இறுதியாண்டுக்கான பாடச் சமர்ப்பிப்பை நிறைவு செய்துவிட்டு வீடு திரும்பிக்கொண்டிருந்தபோதே இந்த சோகச் சம்பவம் இடம்பெற்றுள்ளது.
விபத்தில் படுகாயமடைந்த மாணவி உடனடியாக கல்முனை அஷ்ரப் ஞாபகார்த்த வைத்தியசாலையில் அனுமதிக்கப்பட்ட போதிலும், சிகிச்சை பலனின்றி உயிரிழந்துள்ளார்.
உயிரிழந்த மாணவிக்கு திருமணமாகி இரண்டு ஆண்டுகள் ஆகின்ற நிலையில், அவரது கணவர் வெளிநாட்டில் பணிபுரிந்து வருவதாக தெரிவிக்கப்பட்டுள்ளது.
சம்பவம் தொடர்பில் நிந்தவூர் பொலிஸார் ஆரம்பகட்ட விசாரணைகளை மேற்கொண்டுள்ளதுடன், மேலதிக விசாரணைகளும் முன்னெடுக்கப்பட்டு வருகின்றன.
பிரேதப் பரிசோதனையின் பின்னர், தலையில் ஏற்பட்ட பாரிய காயத்தினால் உண்டான தீவிர இரத்தப்போக்கே மரணத்திற்குக் காரணம் எனத் தெரிவிக்கப்பட்டுள்ளது.
