வட மாகாணத்தில் பாடசாலை மாணவர்கள் மற்றும் ஆசிரியர்களை ஏற்றிச் செல்லும் அனைத்து பஸ்களும் , சிசுசெரிய சேவையின் கீழ் பதிவுசெய்யப்பட்டிருக்க வேண்டுமென அறிவுறுத்தப்பட்டுள்ளது.
பதிவு செய்யப்படாமல், உரிய தகுதிகளைப் பூர்த்தி செய்யாமல் சேவையில் ஈடுபடும் பஸ்களுக்கு எதிராக முன்னறிவிப்பின்றி சட்ட நடவடிக்கை கடுமையாக்கப்படுமென வட மாகாண வீதிப்பயணிகள் போக்குவரத்து அதிகாரசபையின் தலைவர் பொறியியலாளர் சூ.விமலேஸ்வரன் எச்சரிக்கை விடுத்துள்ளார்.
வட மாகாணத்தில் பாடசாலை மாணவர்கள் மற்றும் ஆசிரியர்களுக்கான போக்குவரத்துச் சேவையில் ஈடுபடும் பஸ்கள், வீதிப் பயணிகள் போக்குவரத்து அதிகாரசபையில் முறையாகப் பதிவு செய்யப்படுவது கட்டாயமாகும்.
எனினும் உரிய அனுமதியோ அல்லது பதிவோ இன்றி சிசுசெரிய சேவையின் கீழ் இடம்பெறாமல் சில பஸ்கள் தொடர்ந்தும் பாடசாலை போக்குவரத்துச் சேவையில் ஈடுபட்டு வருவது கண்டறியப்பட்டுள்ளதாக சூ.விமலேஸ்வரன் சுட்டிக்காட்டியுள்ளார். குறித்த தரப்பினருக்கு கடந்த ஐந்து மாதங்களாக நேரடியாக எச்சரிக்கைகளும் , தேவையான அறிவுறுத்தல்களும் வழங்கப்பட்டுள்ளன.
இந்நிலையில் இதுவரை உரிய பதிவுகளை மேற்கொள்ளாத மற்றும் நிர்ணயிக்கப்பட்ட தகுதிகளைப் பூர்த்தி செய்யாத தரப்பினர் தொடர்ந்து பாடசாலை சேவையில் ஈடுபட்டால்இ அவர்களுக்கு எதிராக அதிகாரசபையால் உடனடியாக சட்ட நடவடிக்கை எடுக்கப்படும் என அறிவுறுத்தப்பட்டுள்ளது.
எனவே பாடசாலை மாணவர்களையும் , ஆசிரியர்களையும் ஏற்றிச் செல்லும் போக்குவரத்து சேவையுடன் தொடர்புடைய அனைத்து தரப்பினரும் நடைமுறையில் உள்ள விதிமுறைகளுக்கு அமைவாக தங்களைப் பதிவு செய்து தேவையான தகுதிகள் மற்றும் அனுமதிகளைப் பெற்றுக்கொள்ளுமாறு வட மாகாண வீதிப் பயணிகள் போக்குவரத்து அதிகாரசபையின் தலைவர் அறிவுறுத்தியுள்ளார்.









