சித்திரைப் புத்தாண்டை முன்னிட்டு சொந்த ஊர்களுக்குச் செல்லும் மக்களுக்காக விசேட பஸ் மற்றும் ரயில் சேவைகள் முன்னெடுக்கப்படவுள்ளன.
அதற்கமய நாளை மறுதினம் 9 ஆம் திகதி முதல் , 13 ஆம் திகதி வரை விசேட பஸ் சேவையை முன்னெடுக்க இலங்கை போக்குவரத்து சபை தீர்மானித்துள்ளது.
தூர இடங்களுக்காக நாளொன்றுக்கு மேலதிகமாக சுமார் 250 பஸ்கள் வரை சேவையில் ஈடுபடுத்தத் திட்டமிடப்பட்டுள்ளதாக சபை குறிப்பிட்டுள்ளது.
அதனையடுத்து சொந்த ஊர்களுக்குச் சென்ற மக்கள் மீண்டும் கொழும்பு திரும்புவதற்காக ஏப்ரல் மாதம் 17 ஆம் திகதி முதல் , 21 ஆம் திகதி வரை விசேட பஸ் சேவைகள் முன்னெடுக்கப்படும் என இலங்கை போக்குவரத்துச் சபை தெரிவித்துள்ளது.
இதேவேளை தேசிய போக்குவரத்து ஆணைக்குழுவும் எதிர்வரும் 9 ஆம் திகதி முதல் விசேட பஸ் சேவையை முன்னெடுக்கத் திட்டமிட்டுள்ளது.
பயணிகளின் தேவைக்கேற்ப போதுமான அளவு மேலதிக பஸ்களைச் சேவையில் ஈடுபடுத்தத் திட்டமிட்டுள்ளதாக தேசிய போக்குவரத்து ஆணைக்குழு குறிப்பிட்டுள்ளது.
அத்துடன் ஏப்ரல் மாதம் 10 ம் திகதி முதல் இலங்கை புகையிரத திணைக்களமும் புத்தாண்டு நிமித்தம் விசேட புகையிரத சேவைகளை முன்னெடுக்கத் திட்டமிட்டுள்ளது.
கரையோர மார்க்கம், வடக்கு மற்றும் பிரதான மார்க்கங்களில் தற்போது பயணிக்கின்ற புகையிரதங்களுக்கு மேலதிகமாக மேலும் சில விசேட ரயில்களைச் சேவையில் ஈடுபடுத்தத் திட்டமிடப்பட்டுள்ளதாக புகையிரத திணைக்களம் தெரிவித்துள்ளது.









