கண்டியில் நிர்மாணிக்கப்பட்டு வரும் புதிய மஹையாவ கீழ்ச் சுரங்கப்பாதையின் கட்டுமானப் பணிகள் சுமார் 80 சதவீதம் நிறைவடைந்துள்ளதாக போக்குவரத்து மற்றும் நெடுஞ்சாலைகள் பிரதி அமைச்சர் பிரசன்ன குணசேன தெரிவித்துள்ளார்.
மீதமுள்ள பணிகளை துரிதப்படுத்தி, இந்தத் திட்டத்தை டிசம்பர் மாதத்திற்கு முன்னர் நிறைவு செய்ய எதிர்பார்ப்பதாகவும் அவர் தெரிவித்துள்ளார்.
கண்டி–யாழ்ப்பாணம் பிரதான வீதியின் 2+064 முதல் 2+097 கிலோமீற்றர் பகுதிக்கு இடையில் இந்த கீழ்ச் சுரங்கப்பாதை நிர்மாணிக்கப்படுகிறது.
31.7 மீற்றர் நீளமும், 21 மீற்றர் அகலமும், 6.15 மீற்றர் உயரமும் கொண்டதாக இது அமைக்கப்படுகிறது.
சுமார் 650 மில்லியன் ரூபா செலவில் முன்னெடுக்கப்படும் இந்தத் திட்டம், கண்டி நகரில் நிலவும் வாகன நெரிசலைக் குறைப்பதுடன், நகருக்குள் வரும் பயணிகளின் போக்குவரத்து வசதியையும் மேம்படுத்தும் என எதிர்பார்க்கப்படுகிறது.
அத்துடன், வத்தேகம, மாத்தளை, குருணாகல், அனுராதபுரம், பொலன்னறுவை மற்றும் யாழ்ப்பாணம் உள்ளிட்ட பகுதிகளுக்குச் செல்லும் வாகனங்களின் போக்குவரத்தையும் சீராக்கும் என அதிகாரிகள் தெரிவித்துள்ளனர்.
