நோர்வூட் பொலிஸ் பிரிவிற்குட்பட்ட ஹட்டன் – பொகவந்தலாவ பிரதான வீதியில், நோர்வூட் வெஞ்சர் தோட்டப் பகுதியில் இயங்கிவரும் மதுபானசாலையை மூடுமாறும், அதற்கான அனுமதிப்பத்திரத்தை இரத்து செய்யுமாறும் கோரி இன்று (03) காலை பொதுமக்களால் ஆர்ப்பாட்டம் ஒன்று முன்னெடுக்கப்பட்டது.
பதாதைகளை ஏந்தியவாறும், கோஷங்களை எழுப்பியவாறும் மக்கள் இந்த ஆர்ப்பாட்டத்தில் ஈடுபட்டனர்.
சுமார் 25 வருடங்களாக காணப்படும் குறித்த மதுபானசாலை குடியிருப்புப் பகுதியில் இயங்குவதால், அருகிலுள்ள ஆலயத்தில் இடம்பெறும் வழிபாட்டு நிகழ்வுகள் மற்றும் விளையாட்டு மைதானத்தில் நடத்தப்படும் விளையாட்டுப் போட்டிகளுக்கும் இடையூறு ஏற்படுவதாக பொதுமக்கள் சுட்டிக்காட்டியுள்ளனர்.
தோட்டப் பகுதியில் குறித்த மதுபானசாலை அமைந்துள்ளதால், பலர் மாதாந்த சம்பள அடிப்படையில் கடன் புத்தகத்தில் பதிவு செய்து மதுபானம் அருந்தி வருகின்றனர். அதனால் அவர்களின் குடும்ப உறுப்பினர்கள் பல்வேறு அசௌகரியங்களை எதிர்நோக்குவதாகவும் ஆர்ப்பாட்டகாரர்கள் குறிப்பிட்டுள்ளனர்.
சுமார் 1,500 குடும்பங்கள் வாழ்ந்து வரும் குறித்த பகுதியில் ,சமூகச் சீர்கேடுகள் ஏற்படுவதற்கு காரணமான குறித்த மதுபானசாலையை உடனடியாக மூடுவதற்கு ஜனாதிபதி உரிய நடவடிக்கை எடுக்க வேண்டுமென ஆர்ப்பாட்டத்தில் ஈடுபட்டோர் கோரிக்கை விடுத்துள்ளனர்.









