டில்ஷான் மதுஷங்கவின் ஹெக்ரிக்கினால் இலங்கைக்கு வெற்றி

சிம்பாபே மற்றும் சுற்றுலா இலங்கை அணிகளுக்கிடையிலான ஒருநாள் தொடரின் முதல் போட்டியில் இலங்கை அணி 7 ஓட்டங்களினால் வெற்றிப்பெற்று தொடரை வெற்றியுடன் ஆரம்பித்துள்ளது.
ஹராரே சர்வதேச மைதானத்தில் போட்டி இடம்பெற்றது. நாணய சுழற்சியில் வெற்றியீட்டிய சிம்பாபே அணி முதலில் களத்தடுப்பை தெரிவுசெய்தது.
அதனடிப்படையில் துடுப்பெடுத்தாடிய இலங்கை அணி 50 ஓவர்களில் 6 விக்கட்டுகளை இழந்து 298 ஓட்டங்களைப் பெற்றுக்கொண்டது.
ஆரம்பத்தில் ஓட்டங்களை பெற இலங்கை துடுப்பாட்ட வீரர்கள் தடுமாறியபோதும், பின்னர் நிதானமான துடுப்பாட்டத்தை வெளிப்படுத்தி ஓட்ட எண்ணிக்கையை அதிகரித்தனர்.
பெத்தும் நிசங்க 76 ஓட்டங்களையும், ஜனித் லியனகே 70 ஓட்டங்களையும், கமிந்து மென்டிஸ் 57 ஓட்டங்களையும் பெற்றுக்கொடுத்தனர்.
ரிச்சர்ட் நங்கராவா இரண்டு விக்கட்டுகளை வீழ்த்தினார். 299 எனும் வெற்றியிலக்கை நோக்கி பதிலுக்கு துடுப்பெடுத்தாடிய சிம்பாப்பே அணி வெற்றியை நோக்கி நம்பிக்கையுடன் நகர்ந்த நிலையில் இறுதி ஓவரில் 10 ஓட்டங்கள் தேவைப்பட்டது.
டில்ஷான் மதுஸங்க ஹெக்ரிக் சாதனை புரிந்து சிம்பாப்பே அணியின் கனவை தகர்த்தார். இறுதிஓவரின் முதல் பந்தில் சிக்கந்தர் ரசா ஓட்டமிழந்தார். அதனையடுத்து இரண்டு விக்கட்டுகள் வீழ்த்தப்பட இலங்கையணியின் பக்கம் வெற்றி திரும்பியது. சிக்கந்தர் ரசா 92 ஓட்டங்களையும், பென் கரன் 70 ஓட்டங்களையும் பெற்றுக்கொடுத்தனர். இலங்கையணியின் பந்துவீச்சில் மதுஷங்க 4 விக்கட்டுகளையும், அசித்த பெர்ணாண்டோ 3 விக்கட்டுகளையும் வீழ்த்தினர். போட்டியின் ஆட்டநாயகனாக தில்ஷான் மதுஷங்க தெரிவுசெய்யப்பட்டார்.