திருகோணமலை மாவட்ட பொது வைத்தியசாலையில் புதிய இருதய சிகிச்சைப் பிரிவுக்கான கட்டட நிர்மாணப் பணிகள் இன்று முற்பகல் ஜனாதிபதி அநுர குமார திசாநாயக்க தலைமையில் ஆரம்பித்து வைக்கப்பட்டன.
கிழக்கு மாகாண மக்களுக்கு ஒரே இடத்தில் விரிவானதும் நவீன தொழில்நுட்ப வசதிகளுடனும் கூடிய இருதய சிகிச்சை சேவைகளை வழங்கும் நோக்கில் இந்தப் பிரிவு அமைக்கப்படவுள்ளது.
ஜப்பானிய அரசாங்கத்தின் நிதியுதவியுடன், ஜப்பான் சர்வதேச ஒத்துழைப்பு நிறுவனமான JICA ஊடாக, சுகாதாரம் மற்றும் மருத்துவ சேவைகளை மேம்படுத்தும் திட்டத்தின் கீழ், 2 ஆயிரத்து 403 மில்லியன் ரூபாய் செலவில் இந்தத் திட்டம் முன்னெடுக்கப்படுகிறது.
எட்டு மாடிகளைக் கொண்டதாக நிர்மாணிக்கப்படவுள்ள புதிய கட்டடத்தில் அதிநவீன அறுவை சிகிச்சை கூடங்கள், வெளிநோயாளர் பிரிவு, உள்நோயாளர் சிகிச்சை வசதிகள் மற்றும் முழுமையான ஆய்வுகூடங்கள் உள்ளிட்ட வசதிகள் ஏற்படுத்தப்படவுள்ளன.
இதன் நிர்மாணப் பணிகள் 2028 ஆம் ஆண்டு மே மாதமளவில் நிறைவடைய உள்ளன.
இதேவேளை, நாட்டின் சுகாதாரக் கட்டமைப்புடன் தொடர்புடைய 7 ஆயிரத்து 100 மில்லியன் ரூபாய் பெறுமதியான நான்கு புதிய திட்டங்கள் இன்று ஆரம்பிக்கப்பட்டதாக சுகாதார அமைச்சர் நளிந்த ஜயதிஸ்ஸ தெரிவித்துள்ளார்.
நிகழ்வில் நினைவுப் பலகையை திறந்து வைத்து நிர்மாணப் பணிகளை ஆரம்பித்த ஜனாதிபதி, வைத்தியசாலை பணிக்குழாமினருடனும் கலந்துரையாடினார்.
