இந்தோனேசிய தலைநகர் ஜகார்த்தாவை அண்மித்த ஜாவா கடற்பகுதியில் இன்று (12) அதிகாலை 6.5 ரிச்டர் அளவிலான சக்திவாய்ந்த நிலநடுக்கம் பதிவாகியுள்ளது.

அந்நாட்டு நேரப்படி அதிகாலை 4.23 மணியளவில் ஏற்பட்ட இந்த நிலநடுக்கத்தின் மையப்புள்ளி, ஜகார்த்தாவின் ஆயிரம் தீவுகள் பகுதிக்கு வடகிழக்கே கடலில் அமைந்திருந்ததாக தெரிவிக்கப்பட்டுள்ளது.

நிலநடுக்கம் சுமார் 368 கிலோமீட்டர் ஆழத்தில் ஏற்பட்டதாக தகவல்கள் தெரிவிக்கின்றன. ஆரம்பத்தில் 5.9 ரிச்டர் என பதிவான அதிர்வின் அளவு பின்னர் திருத்தப்பட்டதாக தெரிவிக்கப்பட்டுள்ளது.

ஜகார்த்தா உள்ளிட்ட பகுதிகளிலும், ஜாவா மற்றும் சுமாத்ராவின் சில பகுதிகளிலும் நில அதிர்வுகள் உணரப்பட்டுள்ளன.

குறிப்பாக பான்டென், மேற்கு ஜாவா மற்றும் தெற்கு சுமாத்ராவின் தங்கமுஸ் பகுதிகளில் நில அதிர்வுகள் வலுவாக உணரப்பட்டதாக தெரிவிக்கப்பட்டுள்ளது.

நிலநடுக்கம் தொடர்பான மேலதிக தகவல்கள் மற்றும் சாத்தியமான பிந்தைய அதிர்வுகள் குறித்து இந்தோனேசிய புவியியல் மற்றும் பேரிடர் அதிகாரிகள் தொடர்ந்து கண்காணித்து வருகின்றனர்.