சிரேஷ்ட பத்திரிகையாளர் அமரர் பாரதி இராஜநாயகம் எழுதிய கட்டுரைகளின் தொகுப்பாக வெளிவந்துள்ள ‘இலங்கை போருக்குப் பிந்திய தமிழர் அரசியல்’ நூலின் அறிமுக விழா எதிர்வரும் 19ஆம் திகதி சனிக்கிழமை கொழும்பில் நடைபெறவுள்ளது.
பாரதி இராஜநாயகத்தின் நண்பர்கள் வட்டத்தினால் ஏற்பாடு செய்யப்பட்டுள்ள இந்நிகழ்வு, கொழும்புத் தமிழ்ச்சங்கத்தின் விநோதன் மண்டபத்தில் பிற்பகல் 3.45 மணிக்கு நடைபெறவுள்ளது.
சிரேஷ்ட பத்திரிகையாளர் வி. தனபாலசிங்கம் தலைமையில் நடைபெறும் இந்நிகழ்வு மங்கள விளக்கேற்றலுடன் ஆரம்பிக்கப்படுவதுடன், ஆதவன் அக்ஷரன் தமிழ்வாழ்த்து வழங்கவுள்ளார்.
இதனைத் தொடர்ந்து கி. பொன்னுத்துரை வரவேற்புரையாற்றவுள்ளார்.
நூலை முன்வைத்து பல்வேறு தலைப்புகளில் சிறப்புரைகளும் ஆய்வுரைகளும் இடம்பெறவுள்ளன.
சிரேஷ்ட ஊடகவியலாளரும் ஆய்வாளருமான நிக்ஸன், ‘போருக்குப் பிந்திய தமிழர் அரசியல் பாதையும் பயணங்களும்’ என்ற தலைப்பில் உரையாற்றவுள்ளார்.
ஆய்வாளரும் எழுத்தாளருமான சிராஜ் மஸுர், ‘போருக்குப் பிந்திய முஸ்லிம் அரசியல் தெரிவுகளும் தீர்மானங்களும்’ என்ற தலைப்பிலும், சிரேஷ்ட பத்திரிகையாளரும் விரிவுரையாளருமான தேவ கௌரி, ‘பாரதி இராஜநாயகத்தின் சமகால அரசியல் பத்திகள்’ என்ற தலைப்பிலும் உரையாற்றவுள்ளனர்.
அத்துடன், எழுத்தாளரும் அரசியல்வாதியுமான மல்லியப்பு சந்தி திலகர், ‘ஈழப்போரும் மலையக அரசியலும்’ என்ற தலைப்பில் உரை நிகழ்த்தவுள்ளார்.
நிகழ்வின் ஏற்புரையையும் நன்றியுரையையும் நூலின் தொகுப்பாசிரியர் கணபதி சர்வானந்தா வழங்கவுள்ளார்.
நூல் அறிமுக விழாவில் அனைவரும் கலந்து கொண்டு சிறப்பிக்குமாறு ஏற்பாட்டுக் குழுவினர் அழைப்பு விடுத்துள்ளனர்.
