ஸ்ரீலங்கா பொதுஜன பெரமுனவின் பாராளுமன்ற உறுப்பினர் ரோஹித அபேகுணவர்தன தனது அரசியல் வாழ்வின் 27 வருட பூர்த்தியை கொண்டாடும் வகையில் ஏற்பாடு செய்திருந்த நிகழ்வில் ஜனாதிபதி ரணில் விக்கிரமசிங்க கலந்து கொண்டார்.
குறித்த நிகழ்வில் முன்னாள் ஜனாதிபதிகளான கோட்டாபய ராஜபக்ச மற்றும் மஹிந்த ராஜபக்ஷ, ஸ்ரீலங்கா பொதுஜன பெரமுனவின் ஸ்தாபகர் பெசில் ராஜபக்ஷ உள்ளிட்டோரும் பங்கேற்றிருந்தனர்.
இந்நிலையில் நாடு தொடர்பில் சிந்தித்து ஜனாதிபதி ரணில் விக்கிரமசிங்கவுக்கு தொடர்ந்தும் ஆதரவளிக்கவுள்ளதாக பெசில் ராஜபக்ஷ அதன்போது தெரிவித்துள்ளார்.
ஸ்ரீலங்கா பொதுஜன பெரமுன கட்சியை முன்னோக்கி கொண்டு செல்வதில் அரசாங்கத்தின் அங்கமாகச் செயற்படும் ஜனாதிபதிக்கு உதவுவதற்கு அச்சப்படவில்லையெனவும் தங்களுக்கு அச்சமும் இல்லை, கடனும் இல்லை என்பதை மிகுந்த பெருமையுடன் தெரிவிப்பதாகவும் பெசில் ராஜபக்ஷ தெரிவித்துள்ளார்.
நாட்டை காப்பாற்றும் திறன் ஜனாதிபதியிடம் உள்ளது என்பதை கட்சியில் உள்ள அனைவரும் உணர்ந்து அன்று முதல் இன்று வரை ஜனாதிபதிக்கான ஆதரவை உண்மையாக வழங்கிவருவதாகவும் தொடர்ந்து ஆதரவளிக்கவுள்ளதாகவும் ஸ்ரீலங்கா பொதுஜன பெரமுனவின் ஸ்தாபகர் பெசில் ராஜபக்ஷ தெரிவித்துள்ளார்.
நாட்டிற்காகவும், நாட்டு மக்களுக்காகவும் ஜனாதிபதிக்கான முழு ஒத்துழைப்பு வழங்கப்படுமென பெசில் தெரிவித்துள்ளார்.
இதேவேளை நிகழ்வில் கலந்து கொண்ட முன்னாள் ஜனாதிபதி மஹிந்த ராஜபக்ஷ, சவால்களை ஏற்றுக்கொண்டு நாட்டை முன்னோக்கி கொண்டு செல்லும் தலைமைத்துவத்துடன் மக்கள் செயற்பட வேண்டும் என தெரிவித்துள்ளார்.
மொட்டுக்கட்சியின் ஆதரவு யாருக்கு? பெசில் அறிவிப்பு
