பாடசாலையின் இலச்சினையைப் பயன்படுத்தி ஏற்பாடு செய்யப்படும் எந்தவொரு நிகழ்விலும் மதுபானம் மற்றும் போதைப்பொருட்களை விளம்பரப்படுத்துவதும் பயன்படுத்துவதும் முற்றாகத் தடை செய்யப்பட்டுள்ளதாக கல்வி அமைச்சு அறிவித்துள்ளது.
கல்வி அமைச்சினால் வெளியிடப்பட்ட 2026/10 இலக்கச் சுற்றறிக்கையின் கீழ், இந்த விதிமுறையை மீறும் நிகழ்வுகளை உடனடியாகத் தடை செய்ய கல்வி அமைச்சின் செயலாளருக்கு அதிகாரம் வழங்கப்பட்டுள்ளதாக அமைச்சின் இணைப்பாடவிதான வழிகாட்டல் மற்றும் ஆலோசனைக் கிளையின் பிரதிப் பணிப்பாளர் மகேஷ் ரத்நாயக்க தெரிவித்துள்ளார்.
குறிப்பாக பிரபல பாடசாலைகளின் ‘பிக் மேட்ச்’ கிரிக்கெட் நிகழ்வுகளின் போது மாணவர்கள் போதைப்பொருள் பயன்பாட்டில் ஈடுபடுவதாக பெற்றோரிடமிருந்து கிடைத்த முறைப்பாடுகளைத் தொடர்ந்து இந்த நடவடிக்கை எடுக்கப்பட்டுள்ளது.
பாடசாலை இலச்சினையுடன் நடத்தப்படும் எந்தவொரு நிகழ்வும் பாடசாலை நிகழ்வாகவே கருதப்படும் என்றும், புதிய விதிமுறைகள் கடுமையாகக் கண்காணிக்கப்படும் என்றும் கல்வி அமைச்சு தெரிவித்துள்ளது.
