கடனை மீள செலுத்தும் ஸ்தீர நிலையில் இலங்கை

இருதரப்பு கடன் வழங்குநர்களுடனான கடன் மறுசீரமைப்பு செயல்முறை வெற்றி பெறுவதனூடாக, இலங்கைக்கு சுமார் 17 பில்லியன் அமெரிக்க டொலர்கள் நன்மை கிடைக்குமென வெளிவிவகார அமைச்சர் அலி சப்ரி தெரிவித்தார்.

சர்வதேச பிணைமுறிகள் தொடர்பான பேச்சுவார்த்தைகளை வெற்றியடையச் செய்வதற்கு இது உதவுமெனவும் அமைச்சர் குறிப்பிட்டார்.
ஜனாதிபதி ஊடக மையத்தில் இடம்பெற்ற ஊடகவியலாளர் சந்திப்பிலேயே அமைச்சர் அலி சப்ரி இவ்வாறு தெரிவித்தார்.

இதுவரை இருதரப்பு கடன் வழங்கும் நாடுகளுடன் கடன் மறுசீரமைபபு செயற்பாடு வெற்றிகரமாக முன்னெடுக்கப்பட்டுள்ளது. இந்தியா, ஜப்பான் மற்றும் பிரான்ஸ் ஆகிய நாடுகள் ஒன்றிணைந்து இருதரப்பு கடன் முகாமைத்துவத்திற்கான உத்தியோகபூர்வ கடன் வழங்குநர் குழுவை உருவாக்கி அதற்காக செயற்பட்டன. இந்நிலையில் சீனாவுடனும் பேச்சுவார்த்தை நடத்தப்பட்டதாகவும், குறித்த பேச்சுவார்த்தையும் வெற்றியளித்துள்ள நிலையில் கடனை மீள செலுத்தும் நிலைபேறான நாடாக மாறியுள்ளதாகவும் அமைச்சர் அலி சப்ரி தெரிவித்தார்.

சர்வதேச நாணய நிதியத்தால் வழங்கப்பட்ட கால அளவிற்குள் முழுமையான கடன் மறுசீரமைப்பு முன்னெடுக்கப்படுவதாகவும், மொத்தக் கடன் தொகையை மொத்த தேசிய உற்பத்தியில் 95 வீதம் வரை குறைக்க வேண்டுமெனவும் அமைச்சர் குறிப்பிட்டார்.
அத்துடன் வெளிநாட்டுக் கடனுக்கான தற்போதைய வட்டியை மொத்த தேசிய உற்பத்தியில் 4.5 வீதம் வரை குறைக்க வேண்டுமெனவும் வெளிவிவகார அமைச்சர் அலி சப்ரி மேலும் தெரிவித்தார்.