கிரிந்த மீன்பிடி துறைமுகத்தில் மணல் அகழ்வு திட்டத்தை கொரிய நிறுவனம் ஒன்றுக்கு சட்ட நடைமுறைகளை மீறி வழங்கியதன் ஊடாக அரசாங்கத்திற்கு 2.62 பில்லியன் ரூபா கூடுதல் நட்டத்தை ஏற்படுத்திய வழக்கில் சந்தேகநபராக பெயரிடப்பட்டுள்ள கடற்றொழில், நீரியல்வள முன்னாள் அமைச்சர் ராஜித சேனாரத்ன, தனது தொலைபேசி இணைப்பை செயலிழப்பு செய்துவிட்டு வீட்டை விட்டு வெளியேறியுள்ளதாக இலஞ்ச ஒழிப்பு ஆணைக்குழு இன்றைய தினம் (11) கொழும்பு நீதவான் நீதிமன்றத்திற்கு அறிவித்தது.
குறித்த சம்பவம் தொடர்பாக வாக்குமூலம் அளிக்குமாறு பல தடவைகள் ராஜித சேனாரத்னவுக்கு அறிவிக்கப்பட்டபோதும் அவர் பொய்யான காரணிகளை முன்வைத்து, வாக்குமூலம் வழங்குவதை தொடர்ந்து புறக்கணித்து வருவதாக ஆணைக்குழுவின் அதிகாரிகள் நீதிமன்றத்தின் கவனத்திற்கு கொண்டுவந்தனர்.
இந்நிலையில் ராஜித சேனாரத்ன உடல்நலக்குறைவால் பாதிக்கப்பட்டுள்ளதாக வைத்திய அறிக்கை, சட்டத்தரணி ஊடாக இலஞ்ச ஒழிப்பு ஆணைக்குழுவுக்கு சமர்ப்பிக்கப்பட்டுள்ளதாகவும்இ குறித்த அறிக்கையை ஏற்றுக்கொள்வதற்கான எந்தவொரு சட்ட ரீதியான அடிப்படையும் இல்லையெனவும் அதிகாரிகள் நீதிமன்றில் குறிப்பிட்டுள்ளனர்.
ராஜித சேனாரத்னவை கைது செய்ய பிடிவிறாந்து பிறப்பிக்குமாறும் இலஞ்ச ஒழிப்பு ஆணைக்குழுவினர் நீதிமன்றத்தை கோரினர்.
சந்தேக நபருக்கு பிடியாணை பிறப்பிக்கஇ தொடர்புடைய ஆவணங்களை நீதிமன்றத்தின் கவனத்திற்குக் கொண்டுவருவது அவசியம் என்று நீதவான் இலஞ்ச ஒழிப்பு ஆணைக்குழு அதிகாரிகளிடம் சுட்டிக்காட்டினார்.
மேலும் குறித்த சம்பவத்துடன் தொடர்புடைய சந்தேகநபர்களை கைது செய்வதற்கு இலஞ்ச ஒழிப்பு ஆணைக்குழுவிற்கு அதிகாரம் உள்ளதாக நீதவான் சுட்டிக்காட்டினார். சந்தேகநபரைக் கைது செய்து நீதிமன்றில் முன்னிலைப்படுத்த, அதிகாரங்களைப் பயன்படுத்துமாறும் இலஞ்ச ஒழிப்பு ஆணைக்குழுவுக்கு நீதவான் உத்தரவிட்டார்.
