சட்டத்தை விடவும் பெற்றோர் மற்றும் பிள்ளைகளுக்கு இடையிலான வலுவான உறவின் மூலமே, பிள்ளைகளை போதைப்பொருள் பேரழிவிலிருந்து பாதுகாக்க முடியும் என ஜனாதிபதி அநுர குமார திசாநாயக்க தெரிவித்துள்ளார்.
‘முழு நாடுமே ஒன்றாக’ தேசிய செயற்பாட்டுக் குழு ஜனாதிபதி அலுவலகத்தில் இன்று கூடியபோது, ஜனாதிபதி இந்த கருத்தை வெளியிட்டதுடன், அதிகாரிகளுக்கு பல பணிப்புரைகளையும் வழங்கியுள்ளார்.
பிள்ளைகளின் நடத்தைகளை கண்காணிப்பது தொடர்பாக பெற்றோருக்கு விழிப்புணர்வூட்டும் பொறிமுறையொன்றை உருவாக்குமாறும், போதைப்பொருள் பாவனைக்கான ஆபத்து காணப்படும் சந்தர்ப்பங்களில் நம்பகமான ஆசிரியர்கள் மற்றும் மதத் தலைவர்கள் ஊடாக தகவல்களைப் பெறுவதற்கான பயிற்சிகளை வழங்குமாறும் ஜனாதிபதி அறிவுறுத்தியுள்ளார்.
இதேவேளை, அரச இரசாயனப் பகுப்பாய்வாளர் திணைக்களத்தின் வசதிகள் விரிவாக்கப்பட்டதன் மூலம், செப்டெம்பர் மாதத்தில் மாத்திரம் 8,000 பகுப்பாய்வு நடவடிக்கைகள் நிறைவு செய்யப்பட்டுள்ளதாக தெரிவிக்கப்பட்டுள்ளது.
புதிய போதைப்பொருள் கட்டுப்பாட்டுச் சட்டமூலத்தை எதிர்வரும் ஒக்டோபர் மாதம் மூன்றாவது வாரத்திற்குள் நிறைவேற்ற நடவடிக்கை எடுக்குமாறும் ஜனாதிபதி அறிவுறுத்தியுள்ளார்.
மேலும், பொலிஸ், நீதித்துறை மற்றும் சிறைச்சாலை அமைப்புகளை இணைக்கும் மத்திய டிஜிட்டல் கட்டமைப்பை உருவாக்கவும், சமூக வலைத்தளங்கள் ஊடாக இளைஞர்களுக்கு போதைப்பொருளின் பாதிப்புகள் குறித்து விழிப்புணர்வு ஏற்படுத்தும் திட்டங்களை முன்னெடுக்கவும் பணிப்புரை விடுக்கப்பட்டுள்ளது.
