அனர்த்த காலங்களில் பெண்கள் மற்றும் சிறுமிகளின் சுகாதாரத்தைப் பாதுகாக்க 2 இலட்சத்து 50 ஆயிரம் அமெரிக்க டொலர் பெறுமதியான மனிதநேய உதவிப் பொருட்கள் இலங்கைக்கு வழங்கப்பட்டுள்ளன.
ஐக்கிய நாடுகள் மக்கள் தொகை நிதியமான UNFPA, 2 இலட்சத்து 50 ஆயிரத்து 641 அமெரிக்க டொலர் பெறுமதியான அவசரகால மனிதநேய உதவிப் பொருட்களை சுகாதார அமைச்சிடம் கையளித்துள்ளது.
அனர்த்தங்கள் மற்றும் அவசரகாலங்களில் பெண்கள், சிறுமிகள், கர்ப்பிணித் தாய்மார்கள் மற்றும் வயோதிபப் பெண்களின் சுகாதாரம், பாதுகாப்பு மற்றும் கண்ணியத்தைப் பாதுகாப்பதே இந்த உதவியின் முக்கிய நோக்கமாகும்.
இதன் கீழ், அவசரகால பாதுகாப்பு மற்றும் தாய்மை பராமரிப்புக்கான 8 கூடாரங்கள், பொது சுகாதார மருத்துவச்சிகளுக்கான 999 மருத்துவப் பைகள், 1,283 மகப்பேறு உபகரணத் தொகுதிகள், 246 வயோதிபர்களுக்கான தொகுதிகள் மற்றும் பெண்கள் மற்றும் சிறுமிகளுக்கான 1,659 கண்ணியத் தொகுதிகள் வழங்கப்பட்டுள்ளன.
இந்த விசேட உதவித் திட்டத்திற்கு அவுஸ்திரேலியா மற்றும் நியூசிலாந்து அரசாங்கங்கள் நிதியுதவி வழங்கியுள்ளன.
அனர்த்தங்களுக்கு அதிகம் பாதிக்கப்படக்கூடிய மாவட்டங்களில் இந்தப் பொருட்கள் முன்கூட்டியே களஞ்சியப்படுத்தப்படவுள்ளன. இதன் மூலம் அனர்த்தங்கள் ஏற்படும் சந்தர்ப்பங்களில், பாதிக்கப்பட்டவர்களுக்கு அவசர சுகாதார மற்றும் பாதுகாப்புச் சேவைகளை தாமதமின்றி வழங்க முடியும் என தெரிவிக்கப்பட்டுள்ளது.
