இலங்கை தொழிலாளர் காங்கிரஸின் சிரேஷ்ட உப தவிசாளரும், 25 வருடங்களுக்கும் மேலாக கண்டி மாவட்டத்தில் இலங்கை தொழிலாளர் காங்கிரஸின் பிரதான அமைப்பாளராகவும் பணியாற்றிய துரை மதியுகராஜா எதிர்க்கட்சித் தலைவர் சஜித் பிரேமதாசவின் அரசியல் பயணத்திற்கு ஆதரவளிக்கும் வகையில் ஐக்கிய மக்கள் சக்தியில் இணைந்து கொண்டார்.
30 ஆண்டுகளுக்கும் மேலான அரசியல் மற்றும் தொழிற்சங்க அனுபவத்துடன் கூடிய முன்னணி தொழிற்சங்கத் தலைவரும் அரசியல்வாதியுமான துரை மதியுகராஜா அரசியல் மற்றும் தொழிற்சங்கங்கள் குறித்த பரந்த அறிவைக் கொண்டவர். அத்தோடு தமிழ் , சிங்களம் மற்றும் ஆங்கிலம் ஆகிய மும்மொழிகளும் உரையாடகூடிய ஆற்றலுள்ளவர்.
இலங்கை தொழிலாளர் காங்கிரஸின் சர்வதேச விவகாரங்களுக்கான பிரதானியாகவும், தொழிலாளர் கல்விப் பொறுப்பாளராகவும், இலங்கை தொழிலாளர் காங்கிரஸின் யாப்புத் திருத்தக் குழுவின் உறுப்பினராகவும், மாகாண எல்லை நிர்ணயக் குழுவின் உறுப்பினராகவும் எனப் பல பதவிகளை வகித்து அனுபவம் வாய்ந்த அரசியல்வாதியென்பது சுட்டிக்காட்டதக்கது.
