தமிழக முதலமைச்சர் விஜய்யின் மகன் ஜேசன் சஞ்சய் இயக்கியுள்ள சிக்மா திரைப்படம், எதிர்வரும் அக்டோபர் 2ஆம் தேதி திரையரங்குகளில் வெளியாகவுள்ளது.
இதையொட்டி தீவிரமான புரமோஷன் பணிகளில் ஈடுபட்டுள்ள ஜேசன் சஞ்சய், அண்மையில் வழங்கிய பேட்டியில் தனது தந்தை விஜய் மற்றும் குடும்பம் குறித்து பல்வேறு தகவல்களை பகிர்ந்துள்ளார்.
தனது தந்தையின் தற்போதைய வாழ்க்கைச் சூழலை கருத்தில் கொண்டு, குடும்பத்தின் நற்பெயரை பாதுகாப்பது மிகவும் முக்கியம் என ஜேசன் தெரிவித்துள்ளார்.
தனது தனிப்பட்ட வாழ்க்கையில் சில வரம்புகளை கடைப்பிடிக்க வேண்டியுள்ளதாகவும், தனது செயல்களால் குடும்பத்திற்கு எந்தவிதமான பாதிப்பும் ஏற்படக்கூடாது என்பதில் கவனமாக இருப்பதாகவும் அவர் கூறியுள்ளார்.
மேலும், விஜய்யின் தனிப்பட்ட நகைச்சுவை உணர்வை தான் மிகவும் ரசிப்பதாகவும், அந்த இயல்பான பக்கத்தை திரையில் வெளிக்கொண்டு வருவதற்கான வாய்ப்பு கிடைத்தால் அதனை செய்ய விரும்புவதாகவும் ஜேசன் தெரிவித்துள்ளார்.
இதேவேளை, தனது முதல் திரைப்படத்தின் புரமோஷனில் விஜய் பங்கேற்கவில்லை என்றும், படத்தின் மீதான கவனம் தனது தந்தையின் அரசியல் அடையாளத்தை நோக்கி செல்லாமல், சிக்மா திரைப்படத்தின் மீதே இருக்க வேண்டும் என்பதே தனது விருப்பம் என்றும் ஜேசன் ஏற்கனவே தெரிவித்திருந்தார்.
ஜேசன் சஞ்சய் இயக்கத்தில், சந்தீப் கிஷன் மற்றும் ஃபரியா அப்துல்லா உள்ளிட்டோர் நடிப்பில் உருவாகியுள்ள சிக்மா, அக்டோபர் 2ஆம் தேதி தமிழ் மற்றும் தெலுங்கு மொழிகளில் வெளியாகவுள்ளது.
