தெஹிவளை கைக்குண்டுத் தாக்குதல். இரு சந்தேகநபர்கள் கைது

தெஹிவளை கைக்குண்டுத் தாக்குதல் சம்பவம் தொடர்பில் மேலும் இரு சந்தேகநபர்கள் கைது செய்யப்பட்டுள்ளனர்.

தெஹிவளை பொலிஸ் பிரிவுக்குட்பட்ட பகுதியில் கடந்த 11ம் திகதி அதிகாலை வீடொன்றின் மீது கைக்குண்டு வீசப்பட்டதில், ஒரே குடும்பத்தைச் சேர்ந்த 11 மற்றும் 17 வயதுடைய இரு சிறுவர்கள் உயிரிழந்ததுடன், அவர்களின் தந்தை படுகாயமடைந்தார்.

இச்சம்பவம் தொடர்பில் மேல் மாகாண தெற்கு மாவட்ட குற்றப் புலனாய்வுப் பிரிவினர் தீவிர விசாரணைகளை முன்னெடுத்து வருகின்றனர்.

சம்பவத்துடன் தொடர்புடைய பிரதான சந்தேகநபர் உள்ளிட்ட மூவர் ஏற்கனவே ரிதீமாலியத்த, தெஹிவளை மற்றும் பொரலஸ்கமுவை ஆகிய பொலிஸ் பிரிவுகளில் வைத்து கைது செய்யப்பட்டு, நீதிமன்ற உத்தரவின் பேரில் விளக்கமறியலில் வைக்கப்பட்டுள்ளனர்.

இந்நிலையில், முன்னதாக கைது செய்யப்பட்ட சந்தேகநபர்களிடம் மேற்கொள்ளப்பட்ட விசாரணைகளின் அடிப்படையில், மேலும் இருவர் கைது செய்யப்பட்டுள்ளதாக பொலிஸார் தெரிவித்துள்ளனர்.

கைது செய்யப்பட்ட இருவரிடமிருந்து 11 கிராம் 960 மில்லிகிராம் அளவிலான ‘ஐஸ்’ எனப்படும் மெத்தாம்பெட்டமைன் போதைப்பொருள் கைப்பற்றப்பட்டுள்ளது.

அத்துடன், குற்றச்செயலுக்குப் பயன்படுத்தப்பட்டதாக சந்தேகிக்கப்படும் முச்சக்கரவண்டி ஒன்றும் பொலிஸாரால் கைப்பற்றப்பட்டுள்ளது.

கைது செய்யப்பட்ட சந்தேகநபர்கள் 30 மற்றும் 31 வயதுடையவர்கள் எனவும், அவர்கள் முறையே பிலியந்தலை மற்றும் கஹத்துடுவ பகுதிகளைச் சேர்ந்தவர்கள் எனவும் பொலிஸார் தெரிவித்துள்ளனர்.

மேலும், இந்தத் தாக்குதல் தவறான வீட்டை இலக்கு வைத்து நடத்தப்பட்டிருக்கலாம் என ஆரம்பகட்ட விசாரணைகளில் தெரியவந்துள்ளதாக முன்னதாக பொலிஸார் தெரிவித்திருந்தனர்.

சம்பவம் தொடர்பான மேலதிக விசாரணைகள் மேல் மாகாண தெற்கு மாவட்ட குற்றப் புலனாய்வுப் பிரிவினரால் தொடர்ந்து முன்னெடுக்கப்பட்டு வருகின்றன.