மகாவலி ஆறு பெருக்கெடுத்துள்ளதால் நாவலப்பிட்டிய பகுதியில் ஏற்படக்கூடிய அவசர அனர்த்த நிலைமைகளிலிருந்து மக்களை பாதுகாப்பதற்காக கடற்படை மற்றும் இராணுவத்தினர் விசேடமாக அப்பகுதியில் நிலைநிறுத்தப்பட்டுள்ளதாக கண்டி மாவட்ட அனர்த்த முகாமைத்துவ பிரிவு தெரிவித்துள்ளது.
அவசர நிலை ஏற்பட்டால் உடனடியாக நிவாரண நடவடிக்கைகளை மேற்கொள்ளும் வகையில், கடற்படையினரால் உயிர்காக்கும் படகுகள் நாவலப்பிட்டிய பொலிஸ் நிலையத்திற்கு கொண்டு வரப்பட்டுள்ளன.
மகாவலி ஆறு பெருக்கெடுத்ததன் காரணமாக நாவலப்பிட்டியவின் கித்துல்கொட்டே மற்றும் லபுவெல்கொட்டுவ பகுதிகளில் 13 குடும்பங்களைச் சேர்ந்த சுமார் 30 பேர் பாதிக்கப்பட்டுள்ளனர்.
அவர்கள் பாதுகாப்பாக நாவலப்பிட்டிய இம்புல்பிட்டிய கனிஷ்ட வித்தியாலயத்தில் தற்காலிகமாக தங்க வைக்கப்பட்டுள்ளனர்.
இதனிடையே, நாவலப்பிட்டிய பகுதியில் தற்போது மழைவீழ்ச்சி குறைந்து வருவதால், வெள்ளத்தால் பாதிக்கப்பட்ட வீடுகளில் தேங்கியுள்ள நீரின் மட்டமும் படிப்படியாக குறைந்து வருவதாக தெரிவிக்கப்பட்டுள்ளது.
