உலக ஈட்டி எறிதல் செம்பியன் ருமேஷ் தரங்கவின் ஈட்டி தொகுப்பு சேதமடைந்தமை தொடர்பில் சம்பந்தப்பட்ட விமான நிறுவனத்திடம் முறைப்பாடு செய்யப்பட்டுள்ளதாக விளையாட்டுத்துறை அமைச்சர் சுனில் குமார கமகே தெரிவித்துள்ளார்.
உலக தடகள அல்டிமேட் செம்பியன்ஷிப்பை வென்ற ருமேஷ் தரங்க, தனது வெற்றிகளுக்காக பயன்படுத்திய ஐந்து ஈட்டிகளும் அவர் பயணித்த விமானத்தில் சேதமடைந்துள்ளன.
சேதமடைந்த ஈட்டிகளில், புடாபெஸ்டில் 91.09 மீற்றர் தூரம் எறிந்த ஈட்டியும், சுவிட்சர்லாந்தின் சூரிச்சில் 92.07 மீற்றர் தூரம் எறிந்த ஈட்டியும் அடங்குகின்றன.
குறித்த விடயம் தொடர்பில் ருமேஷ் தரங்க, கட்டுநாயக்க விமான நிலையத்தில் சம்பந்தப்பட்ட விமான சேவைக்கு எதிராக முறைப்பாடு ஒன்றையும் பதிவு செய்துள்ளார்.
மேலும், ருமேஷ் தரங்கவுக்கு புதிய ஈட்டி தொகுப்பை விரைவில் வழங்குவதற்கான நடவடிக்கைகள் முன்னெடுக்கப்படும் என விளையாட்டுத்துறை அமைச்சர் தெரிவித்துள்ளார்.
