சீன ஜனாதிபதி ஜி ஜின்பிங், ஏழு ஆண்டுகளுக்குப் பின்னர் முதல்முறையாக இந்தியா வந்தடைந்துள்ளார். புதுடெல்லியில் நடைபெறும் 18ஆவது BRICS உச்சிமாநாட்டில் பங்கேற்பதற்காக அவர் இன்று (12) இந்தியா வந்தடைந்தார்.
இந்திய பிரதமர் நரேந்திர மோடியின் அழைப்பின் பேரில் இந்தியா வந்துள்ள ஜி ஜின்பிங், BRICS உச்சிமாநாட்டில் பங்கேற்பதுடன், பிரதமர் மோடியையும் சந்தித்து இருதரப்பு பேச்சுவார்த்தை நடத்த உள்ளார்.
2020ஆம் ஆண்டு கல்வான் பள்ளத்தாக்கில் இடம்பெற்ற இருநாட்டு இராணுவ மோதலுக்குப் பின்னர் இந்தியா–சீனா உறவுகளில் ஏற்பட்ட பதற்றத்தின் பின்னணியில், ஜி ஜின்பிங்கின் இந்த இந்தியப் பயணம் முக்கியத்துவம் பெற்றுள்ளது.
அந்த மோதலில் 20 இந்திய மற்றும் 4 சீன வீரர்கள் உயிரிழந்தனர். அதன் பின்னர் இரு நாடுகளுக்கும் இடையிலான உறவுகள் கடுமையாக பாதிக்கப்பட்டிருந்தன.
எனினும், கடந்த சில ஆண்டுகளில் இரு நாடுகளும் உறவுகளை படிப்படியாக சீரமைக்கும் நடவடிக்கைகளை முன்னெடுத்து வருகின்றன. எல்லைப் பதற்றத்தை குறைப்பதற்கான முயற்சிகள், வர்த்தகம் மற்றும் நேரடி விமான சேவைகளை மீள ஆரம்பித்தல் உள்ளிட்ட சில முன்னேற்றங்கள் ஏற்பட்டுள்ளன.
BRICS உச்சிமாநாட்டின் பக்க நிகழ்வாக நடைபெறவுள்ள மோடி – ஜி ஜின்பிங் சந்திப்பு மீது சர்வதேச கவனம் திரும்பியுள்ளது.
இருதரப்பு உறவுகளை மேலும் மேம்படுத்துதல், வர்த்தகம், எல்லைப் பிரச்சினைகள் மற்றும் பிராந்திய பாதுகாப்பு உள்ளிட்ட விடயங்கள் குறித்து இரு தலைவர்களும் கலந்துரையாடுவார்கள் என எதிர்பார்க்கப்படுகிறது.
BRICS உச்சிமாநாட்டில் முக்கிய உலக விவகாரங்கள்
இந்தியாவின் தலைமையில் புதுடெல்லியில் நடைபெறும் BRICS உச்சிமாநாட்டில் உறுப்புநாடுகளின் தலைவர்கள் பங்கேற்றுள்ளனர்.
வர்த்தகம், முதலீடு, எரிசக்தி, உணவுப் பாதுகாப்பு, தொழில்நுட்பம் மற்றும் உலகளாவிய பொருளாதார ஒத்துழைப்பு உள்ளிட்ட விடயங்கள் முக்கிய விவாதப் பொருட்களாக உள்ளன. அதேவேளை, உக்ரைன் போர், மத்திய கிழக்கு மோதல்கள் மற்றும் உலகளாவிய புவிசார் அரசியல் பதற்றங்களும் மாநாட்டின் பின்னணியில் முக்கிய இடம் பெற்றுள்ளன.
இந்த நிலையில், ஏழு ஆண்டுகளுக்குப் பின்னர் ஜி ஜின்பிங் இந்தியா வந்துள்ளமை இந்தியா–சீனா உறவுகளில் புதிய கட்டத்திற்கான அறிகுறியாக அமையுமா என்பதும் சர்வதேச அரசியல் வட்டாரங்களில் கவனிக்கப்பட்டு வருகிறது.
