நாடு முழுவதிலுமுள்ள சகல பாடசாலைகளின் முன்பாகவும் நாளை செவ்வாய்க்கிழமை கறுப்புக்கொடி போராட்டம் முன்னெடுக்கப்படவுள்ளதாக இலங்கை ஆசிரியர் சங்கத்தின் பொதுச்செயலாளர் ஜோசப் ஸ்டாலின் அறிவித்துள்ளார்.
பிற்பகல் 2 மணியளவில் பாடசாலை ஆசிரியர்கள், அதிபர்களின் பங்கேற்புடன் குறித்த போராட்டம் முன்னெடுக்கப்படுமெனவும் அவர் குறிப்பிட்டுள்ளார்.
கடந்த வாரம் கொழும்பில் அதிபர் – ஆசிரியர்கள் முன்னெடுத்த ஆர்ப்பாட்ட பேரணியின்போது , அவர்கள் மீது மேற்கொள்ளப்பட்ட கண்ணீர்புகைப் பிரயோகம் மற்றும் நீர்த்தாரைப் பிரயோகம் என்பவற்றுக்கு கண்டனம் தெரிவித்தே குறித்த கறுப்புகொடி போராட்டம் முன்னெடுக்கப்படவுள்ளதாக ஊடகவிலாயர் சந்திப்பின்போது ஜோசப் ஸ்டாலின் குறிப்பிட்டார்.
இந்நிலையில் குறித்த விடயம் தொடர்பில் எதிர்வரும் வியாழக்கிழமை அனைத்து தொழிற்சங்கங்களுடன் பேச்சுவார்த்தையொன்று முன்னெடுக்கப்படவுள்ளதாகவும், அரசாங்கம் உரிய தீர்வொன்றை வழங்காத பட்சத்தில் போராட்டம் தீவிரப்படுத்தப்படுமெனவும் இலங்கை ஆசிரியர் சங்கத்தின் பொதுச்செயலாளர் ஜோசப் ஸ்டாலின் தெரிவித்தார்.
இதேவேளை கொழும்பில் இடம்பெற்ற போராட்டத்தின்போது பொலிசாரின் கண்ணீர்புகைப் பிரயோகம் மற்றும் நீர்த்தாரைப் பிரயோகத்தின்போது 10 ஆசிரியர்கள் காயமடைந்ததாகவும் ஜோசப் ஸ்டாலின் சுட்டிக்காட்டியுள்ளார்.
