யாழ்ப்பாணம், கிளிநொச்சி, முல்லைத்தீவு, மன்னார் மற்றும் வவுனியா மாவட்டங்களில் அமைந்துள்ள வைத்தியசாலைகளை மேம்படுத்துவதன் மூலம் வட மாகாண மக்களுக்கு வினைத்திறனான சிறந்த சுகாதார சேவைகளை வழங்கும் நோக்கில் சுகாதார மற்றும் ஊடகதுறை அமைச்சரின் விஐயம் அமைந்திருந்தது .
யாழ்ப்பாணம் போதனா வைத்தியசாலையின் வெளிநோயாளர் பிரிவு, அறுவை சிகிச்சை பிரிவு, உள்நோயாளிகள் பிரிவுகள், அவசர சிகிச்சை பிரிவு, இருதய சிகிச்சை பிரிவு மற்றும் ஆய்வகங்கள், சி.டி ஸ்கேன் பிரிவு, எலும்பியல் மற்றும் சிறுநீரக அறுவை சிகிச்சை பிரிவு, என்பவற்றறை பார்வையிட்ட அமைச்சர் நலிந்த ஜயதிஸ்ஸ வைத்தியசாலையின் மேம்பாட்டுத் திட்டங்கள் மற்றும் குறித்த திட்டங்களின் தற்போதைய நிலை மற்றும் எதிர்கால செயல்பாடுகள் ஆகியவற்றையும் கேட்டறிந்தார்.
அதன்போது வைத்தியசாலையின் இயக்குநர் மற்றும் ஏனைய அதிகாரிகளுக்கு நோயாளர் பராமரிப்பு சேவைகளை மிகவும் வினைத்திறனாக முன்னெடுப்பதற்கான அறிவுறுத்தல்களும் வழங்கப்பட்டன. வைத்தியசாலை பணிகுழாமின் பிரச்சினைகளை முன்வைக்க சந்தர்ப்பம் வழங்கப்பட்டது.
இந்நிலையில் வைத்தியசாலைக்கு வருகைதரும் நோயாளிகளுக்கு தேவையான அனைத்து வைத்திய மற்றும் பராமரிப்பு சேவைகளை வழங்கி அவர்களை ஆரோக்கியமான நபர்களாக மாற்றுவது சுகாதாரத் துறையில் பணிபுரியும் அனைவரின் பொறுப்பு என அமைச்சர் தெரிவித்தார்.
யாழ்ப்பாணம் போதனா வைத்தியசாலையின் மனித மற்றும் பௌதீக வளங்களை மேம்படுத்துவதற்கான திட்டத்திற்காக எதிர்கால நடவடிக்கைகள் மேற்கொள்ளப்படுமெனவும் அமைச்சர் தெரிவித்தார்.
அமைச்சர் ராமலிங்கம் சந்திரசேகர், யாழ் மாவட்ட பாராளுளுமன்ற உறுப்பினர்களான டாக்டர் எஸ். ஸ்ரீபவனநாதராஜா மற்றும் க.இளங்குமரன், யாழ்ப்பாணம் போதனா வைத்தியசாலையின் இயக்குநர் டாக்டர் இ. சத்தியராமமூர்த்தி உள்ளிட்டோர் அதன்போது இணைந்திருந்தனர்.
