வங்காள விரிகுடாவின் ஆழ்கடல் பகுதிகளில் பயணிக்கும் நெடுநாள் மீன்பிடிப் படகுகளுக்கு வளிமண்டலவியல் திணைக்களம் சிவப்பு எச்சரிக்கை விடுத்துள்ளது.
கிழக்கு-மத்திய வங்காள விரிகுடா மற்றும் அதனை ஒட்டிய வடக்கு அந்தமான் கடற்பரப்புகளில் நிலவும் குறைந்த அழுத்தப் பிரதேசம், மேற்கு நோக்கி நகர்ந்து வடமேற்கு திசையை நோக்கி நகர்ந்து வருவதாகத் தெரிவிக்கப்பட்டுள்ளது.
இந்த குறைந்த அழுத்தப் பிரதேசம் இன்று குறைந்த அழுத்தப் பிரதேசமாகவும், நாளைய தினம் தீவிர குறைந்த அழுத்தப் பிரதேசமாகவும் வலுவடைவதற்கான அதிக வாய்ப்புள்ளதாக வளிமண்டலவியல் திணைக்களம் தெரிவித்துள்ளது.
செப்டெம்பர் 23ஆம் திகதியளவில், இந்தப் பிரதேசம் வடக்கு ஆந்திரப் பிரதேசம் மற்றும் தெற்கு ஒடிசா கடலோரப் பகுதிகளை அண்மித்த வங்காள விரிகுடா பகுதிகளைச் சென்றடையக்கூடும் என எதிர்பார்க்கப்படுகிறது.
இதன் காரணமாக குறித்த கடற்பகுதிகளில் காற்றின் வேகம் மணிக்கு 55 முதல் 65 கிலோமீற்றர் வரை அதிகரிக்கக்கூடும். சில சந்தர்ப்பங்களில் காற்றின் வேகம் மணிக்கு 70 கிலோமீற்றர் வரை அதிகரிக்கக்கூடும் எனவும் எச்சரிக்கப்பட்டுள்ளது.
அத்துடன், கடல் கொந்தளிப்பாக அல்லது மிகவும் கொந்தளிப்பான நிலையில் காணப்படுவதுடன், இடிமின்னலுடன் கூடிய பலத்த மழையும் பெய்யக்கூடும் என தெரிவிக்கப்பட்டுள்ளது.
எனவே, மறுஅறிவித்தல் வரை குறித்த கடற்பகுதிகளில் மீன்பிடி மற்றும் கடற்பயண நடவடிக்கைகளில் ஈடுபடுவதைத் தவிர்க்குமாறு மீனவர்கள் மற்றும் கடற்பயணிகளுக்கு வளிமண்டலவியல் திணைக்களம் அறிவுறுத்தியுள்ளது.
மேலும், தற்போது அந்தப் பகுதிகளில் தங்கியுள்ள மீன்பிடிப் படகுகளை பாதுகாப்பான கடற்பகுதிகளுக்கு நகர்த்துமாறும் அறிவுறுத்தப்பட்டுள்ளது.
