சீனா மற்றும் தெற்காசிய நாடுகளுடன் கடல்சார் அறிவியல், கடற்றொழில், நீர்வாழ் உயிரின வளர்ப்பு, நீலப் பொருளாதாரம், தொழில்நுட்பம், முதலீடு மற்றும் மனிதவள மேம்பாடு உள்ளிட்ட துறைகளில் நீண்டகால ஒத்துழைப்பை வலுப்படுத்த இலங்கை தயாராக இருப்பதாக கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர் தெரிவித்துள்ளார்.
சீனாவின் குயிங்தவோவில் நடைபெற்ற “சீனா–தெற்காசிய நாடுகளின் கடல்சார் ஒத்துழைப்பு மன்ற” கருத்தரங்கில் உரையாற்றியபோதே அவர் இதனைத் தெரிவித்தார்.
காலநிலை மாற்றம், கடல்சார் சுற்றுச்சூழல் பாதுகாப்பு, அனர்த்த முன்னெச்சரிக்கை, கடல்சார் அறிவியல் மற்றும் தொழில்நுட்பம் உள்ளிட்ட விடயங்களில் சீனா, இலங்கை, பங்களாதேஷ், மாலைதீவு மற்றும் பாகிஸ்தான் பிரதிநிதிகள் கலந்துரையாடினர்.
இலங்கையின் எதிர்கால கடற்றொழில் அபிவிருத்தி, மீன் வளங்களின் மீதான அழுத்தத்தை அதிகரிக்காமல் நீர்வாழ் உயிரின வளர்ப்பு, கடல்சார் தொழில்கள், பெறுமதி சேர்க்கப்பட்ட உற்பத்திகள் மற்றும் புதிய தொழில்நுட்பங்களை மேம்படுத்தும் வகையில் அமைய வேண்டும் என அமைச்சர் வலியுறுத்தினார்.
இந்தியப் பெருங்கடலில் இலங்கையின் புவியியல் அமைவிடத்தைப் பயன்படுத்தி, நிலையான கடல்சார் பொருளாதார வளர்ச்சிக்கும் வளப் பாதுகாப்புக்கும் இடையே சமநிலையைப் பேணுவது அவசியம் என்றும் அவர் குறிப்பிட்டார்.
