உலக சாம்பியன் ஈட்டி எறிதல் வீரர் ருமேஷ் தரங்கவின் விளையாட்டு உபகரணங்கள் சேதமடைந்த விடயம் தொடர்பில் துருக்கி எயார்லைன்ஸ் நிறுவனத்தின் பிரதிநிதிகள் வருத்தம் தெரிவித்துள்ளதாக தெரிவிக்கப்பட்டுள்ளது.
விமானப் பயணத்தின்போது தரங்கவின் ஐந்து ஈட்டிகள் சேதமடைந்திருந்த நிலையில், இந்த சம்பவம் தொடர்பில் நிறுவனத்திற்குள் முறையான விசாரணை நடத்தி, ஏற்பட்ட சேதத்தை மதிப்பீடு செய்ய துருக்கி எயார்லைன்ஸ் ஒப்புக்கொண்டுள்ளதாக தகவல்கள் தெரிவிக்கின்றன.
மேலும், பாதிக்கப்பட்ட வீரருக்கு உரிய இழப்பீட்டை வழங்குவதற்கான நடவடிக்கைகளை மேற்கொள்ளவுள்ளதாகவும் நிறுவன பிரதிநிதிகள் தெரிவித்துள்ளனர்.
இதனிடையே, விளையாட்டுத்துறை அமைச்சு ருமேஷ் தரங்கவின் பயிற்சிக்கு பாதிப்பு ஏற்படாத வகையில் புதிய சர்வதேச தரத்திலான ஈட்டிகளை அரச செலவில் வழங்க நடவடிக்கை எடுத்துள்ளது.
உலக அரங்கில் இலங்கைக்கு பெருமை சேர்த்த வீரரின் உபகரணங்கள் சேதமடைந்த விவகாரத்தில் அரசாங்கம் நேரடியாக தலையிட்டு நடவடிக்கை மேற்கொண்டுள்ளது.
