கிங் கங்கை மற்றும் நில்வலா கங்கையை ஒட்டியுள்ள பல தாழ்நிலப் பகுதிகளுக்கு அடுத்த 24 மணித்தியாலங்களுக்கு சிறு வெள்ள அபாயம் நிலவுவதாக நீர்ப்பாசனத் திணைக்களம் எச்சரிக்கை விடுத்துள்ளது.
இன்று அதிகாலை இரண்டு முப்பது மணிக்கு வெளியிடப்பட்ட இந்த எச்சரிக்கை, நாளை அதிகாலை இரண்டு முப்பது மணி வரை அமுலில் இருக்கும் என அறிவிக்கப்பட்டுள்ளது.
கிங் கங்கை படுகையின் நீர்ப்பிடிப்புப் பகுதிகளில் தற்போது கணிசமான அளவில் பலத்த மழை பெய்துள்ளதுடன், தொடர்ந்து மழை பெய்து வருவதாக நீர்ப்பாசனத் திணைக்களம் தெரிவித்துள்ளது.
இதன்படி, தவலம, நாகொட, பத்தேகம மற்றும் வெலிவிட்டிய – திவிதுர ஆகிய பிரதேச செயலகப் பிரிவுகளுக்குட்பட்ட கிங் கங்கையின் தாழ்நிலப் பகுதிகளில் சிறு வெள்ள நிலைமை ஏற்படக்கூடும் என எச்சரிக்கப்பட்டுள்ளது.
இதேவேளை, நில்வலா கங்கை படுகையிலும் நீர்மட்டம் அதிகரித்து வருவதன் காரணமாக, பஸ்கொட, கொட்டபொல, பிட்டபெத்தரை, அக்குரஸ்ஸ, அதுரலிய, மாலிம்பட, கம்புருப்பிட்டிய மற்றும் திககொட ஆகிய பிரதேச செயலகப் பிரிவுகளுக்குட்பட்ட தாழ்நிலப் பகுதிகளிலும் சிறு வெள்ள அபாயம் ஏற்படக்கூடும் என தெரிவிக்கப்பட்டுள்ளது.
எனவே, குறித்த பகுதிகளில் வசிக்கும் பொதுமக்களும், அந்தப் பகுதிகள் ஊடாக பயணிக்கும் வாகன சாரதிகளும் மிகுந்த அவதானத்துடன் செயற்படுமாறு நீர்ப்பாசனத் திணைக்களம் கேட்டுக்கொண்டுள்ளது.
