வலிகாமம் வடக்கு பிரதேச சபையின் எல்லைக்கு உட்பட்ட கீரிமலை பகுதியில் கொட்டப்பட்டிருந்த ஆபத்தான மருத்துவக் கழிவுகளை உடனடியாக அகற்றுமாறு வடக்கு மாகாண உள்ளூராட்சி திணைக்களம் விடுத்த அறிவுறுத்தலைத் தொடர்ந்து, குறித்த கழிவுகள் அனைத்தும் அகற்றப்பட்டுள்ளன.
கீரிமலையில் ஆபத்தான மருத்துவக் கழிவுகள் கொட்டப்பட்டமை தொடர்பில் முறைப்பாடுகள் கிடைக்கப்பெற்றிருந்ததுடன், அது தொடர்பான தகவல்கள் சமூக வலைத்தளங்களிலும் வெளியாகியிருந்தன.
இதனையடுத்து, நேற்று 19ஆம் திகதி சனிக்கிழமை, குறித்த மருத்துவக் கழிவுகளை அகற்றுமாறும், இதுவரை மேற்கொள்ளப்பட்ட நடவடிக்கைகள் தொடர்பான முழுமையான அறிக்கையை சமர்ப்பிக்குமாறும் வடக்கு மாகாண உள்ளூராட்சி திணைக்களம், வலிகாமம் வடக்கு பிரதேச சபைக்கு அறிவுறுத்தியிருந்தது.
இதற்கமைய, கீரிமலை பகுதியில் கொட்டப்பட்டிருந்த ஆபத்தான மருத்துவக் கழிவுகள் அனைத்தும் தற்போது அகற்றப்பட்டுள்ளதாக தெரிவிக்கப்பட்டுள்ளது.
