கிழக்கு மாகாணத்தின் காணிகளைப் பாதுகாப்பதற்காக நியமிக்கப்பட்ட குழுவின் இரண்டாவது கூட்டம், ஜனாதிபதி அலுவலகத்தில் இடம்பெற்றது.
ஜனாதிபதியின் தலைமை அதிகாரி பிரபாத் சந்திரகீர்த்தி தலைமையில் நடைபெற்ற கூட்டத்தில், சட்டவிரோத காணி ஆக்கிரமிப்புகளைத் தடுப்பது, கடற்கரைப் பகுதிகளைப் பாதுகாப்பது மற்றும் சம்பந்தப்பட்ட அரச நிறுவனங்களை ஒருங்கிணைத்து காணி தொடர்பான பிரச்சினைகளுக்கு விரைவான தீர்வுகளை வழங்குவது குறித்து கலந்துரையாடப்பட்டது.
குழுவினால் இதுவரை மேற்கொள்ளப்பட்ட கள ஆய்வுகளின் முன்னேற்றம் மற்றும் தற்போதைய நிலைமை தொடர்பாகவும் விரிவாக ஆராயப்பட்டது.
கிழக்கு மாகாணத்தின் கடற்கரைப் பகுதிகளில் இடம்பெறும் அனுமதியற்ற கட்டுமானங்கள், அரச காணி ஆக்கிரமிப்புகள் மற்றும் வனஜீவராசிகள் பாதுகாப்புத் திணைக்களத்திற்குச் சொந்தமான காணிகளை சட்டவிரோதமாக ஆக்கிரமித்தல் உள்ளிட்ட விடயங்கள் தொடர்பில் சம்பந்தப்பட்ட அதிகாரிகளிடம் தகவல்கள் கோரப்பட்டன.
இந்த விடயங்கள் தொடர்பான முழுமையான அறிக்கையை இரண்டு மாதங்களுக்குள் சமர்ப்பிக்குமாறு குழு அதிகாரிகளுக்கு அறிவுறுத்தியுள்ளது.
மேலும், அருகம்பே கடற்கரைப் பகுதியில் இடம்பெறும் அனுமதியற்ற கட்டுமானங்கள் தொடர்பிலும் இடைக்கால அறிக்கையொன்றைப் பெற்றுக்கொள்ள தீர்மானிக்கப்பட்டுள்ளது.
அத்துடன், குறித்த அறிக்கைகளைத் தயாரிக்கும் போது மாவட்டச் செயலாளர்கள் மற்றும் பிரதேச செயலாளர்களிடமிருந்தும் தேவையான தகவல்களைப் பெற்றுக்கொள்ளவும் கூட்டத்தில் தீர்மானிக்கப்பட்டது.
