கட்டுநாயக்க விமான நிலையத்தின் 6ஆம் இலக்க பயணப் பொதி பாதை அருகே கைவிடப்பட்டிருந்த 32 கோடி ரூபாய் பெறுமதியான குஷ் போதைப்பொருள் தொகையை விமான நிலைய பொலிஸ் போதைப்பொருள் ஒழிப்புப் பிரிவினர் கைப்பற்றியுள்ளனர்.
இரண்டு பயணப் பொதிகளுக்குள் காற்று புகாதவாறு 60 பாக்கெட்டுகளில் அடைக்கப்பட்டிருந்த 32 கிலோகிராம் 91 கிராம் குறித்த போதைப்பொருள் தொகை, நேற்று (14) தாய்லாந்தின் பேங்கொக் நகரிலிருந்து வருகை தந்த ஸ்ரீலங்கன் ஏர்லைன்ஸ் நிறுவனத்திற்குச் சொந்தமான UL-405 ரக விமானத்தில் வருகை தந்த பயணி ஒருவரால் கொண்டுவரப்பட்டுள்ளதாக தெரியவந்துள்ளது.
குறித்த பயணி போதைப்பொருள் தொகையை கைவிட்டுத் தப்பிச் சென்றிருக்கலாம் என பொலிஸ் போதைப்பொருள் ஒழிப்புப் பிரிவு சந்தேகம் வெளியிட்டுள்ளது.
பயணப் பொதிகளைக் கொண்டு வந்த விமானப் பயணி யார் என்பதைக் கண்டறிவதற்காக தற்போது விசேட விசாரணை முன்னெடுக்கப்பட்டுள்ளன.
கைப்பற்றப்பட்ட குஷ் போதைப்பொருள் தொகை இன்று (15) நீர்கொழும்பு நீதவான் நீதிமன்றத்தில் சமர்பிக்கப்படவுள்ளது.
