தோட்டப்புறப் பகுதிகளைச் சேர்ந்த பாடசாலைகளை மேம்படுத்துவது அரசாங்கத்தின் பிரதான கல்வி இலக்குகளில் ஒன்றென கல்வி, உயர்கல்வி மற்றும் தொழிற்கல்வி அமைச்சரும் பிரதமருமான கலாநிதி ஹரினி அமரசூரிய தெரிவித்துள்ளார்.
இலங்கை பரீட்சைத் திணைக்களத்தில் கல்வி நிர்வாக சேவை அதிகாரிகளுக்காக நடைபெற்ற தோட்டப்புற பாடசாலைகள் அபிவிருத்திப் பட்டறையில் கலந்துகொண்டு அவர் இதனைத் தெரிவித்தார்.
ஆசிரியர்களுக்கான வீடுகள் அமைத்தல், 34 பாடசாலைகளுக்கு புதிய கட்டிடங்கள் மற்றும் 23 பாடசாலைகளுக்கு பாதுகாப்பு மதில்கள் அமைத்தல் உள்ளிட்ட திட்டங்களுக்கு அமைச்சரவை அனுமதி வழங்கியுள்ளதாக பிரதமர் குறிப்பிட்டார்.
மேலும், ஆசிரியர் பற்றாக்குறையை நிவர்த்தி செய்தல், ஆசிரியர் திறன் மேம்பாடு மற்றும் மாணவர் நலன்புரி நடவடிக்கைகளை முன்னெடுப்பதற்கும் திட்டமிடப்பட்டுள்ளதாக அவர் தெரிவித்தார்.
தோட்டப்புறப் பகுதிகளில் இருந்து தமிழ் மொழி மூல ஆசிரியர்களை அதிகளவில் உள்வாங்குவதற்கான திட்டம் தயாரிக்கப்பட்டுள்ளதாகவும், அதற்காக ஆசிரியர் பயிற்சிக் கலாசாலைகளை மேம்படுத்துவதுடன், கொட்டகலை ஆசிரியர் பயிற்சிக் கலாசாலையை கட்டியெழுப்புவது முக்கிய நோக்கமாக உள்ளதாகவும் பிரதமர் மேலும் தெரிவித்தார்.
