அமெரிக்க ஜனாதிபதி டொனால்ட் ட்ரம்ப், CNN, MS NOW மற்றும் Politico ஆகிய முன்னணி ஊடக நிறுவனங்களுக்கு வெள்ளை மாளிகை அணுகலைத் தடை செய்வதாக அறிவித்துள்ளார்.
தனது Truth Social சமூக வலைத்தளப் பதிவில், குறித்த ஊடக நிறுவனங்கள் தனது நிர்வாகம் தொடர்பில் தொடர்ந்து “போலிச் செய்திகள்” மற்றும் “புனைவுகளையும் பொய்களையும்” வெளியிட்டு வருவதாக ட்ரம்ப் குற்றஞ்சாட்டியுள்ளார்.
இந்தத் தடை உடனடியாக அமுலுக்கு வரும் என அவர் குறிப்பிட்டுள்ளார். மேலும், எதிர்காலத்தில் ஏனைய ஊடக நிறுவனங்களும் இதேபோன்ற நடவடிக்கைக்கு உள்ளாகலாம் எனவும் அவர் எச்சரித்துள்ளார்.
எவ்வாறாயினும், ட்ரம்ப் தனது குற்றச்சாட்டுகளுக்கு குறிப்பிட்ட செய்தி அறிக்கைகள் அல்லது ஆதாரங்களை வெளியிடவில்லை.
அத்துடன், தடை எவ்வாறு நடைமுறைப்படுத்தப்படும் என்பதும், குறித்த ஊடக நிறுவனங்களின் செய்தியாளர்கள் வெள்ளை மாளிகை வளாகத்திற்குள் நுழைவது முழுமையாகத் தடுக்கப்படுமா என்பதும் உடனடியாகத் தெளிவாகவில்லை. அறிவிப்புக்குப் பின்னரும் அந்த ஊடகங்களின் செய்தியாளர்கள் வெள்ளை மாளிகையில் பணியாற்றியதாக அமெரிக்க ஊடகங்கள் தெரிவித்துள்ளன.
CNN மற்றும் Politico ஆகியவை இந்த நடவடிக்கைக்கு எதிர்ப்பு தெரிவித்துள்ளதுடன், தங்களது செய்தியாளர்களின் அரசியலமைப்புச் சட்டத்தால் பாதுகாக்கப்படும் ஊடகச் சுதந்திர உரிமைகளைப் பாதுகாக்க நடவடிக்கை எடுப்பதாக தெரிவித்துள்ளன.
ஊடகச் சுதந்திர அமைப்புகளும் சட்ட வல்லுநர்களும், செய்தி நிறுவனங்களின் செய்தி வெளியீடுகளை அடிப்படையாகக் கொண்டு அவற்றின் அணுகலைக் கட்டுப்படுத்துவது அமெரிக்க அரசியலமைப்பின் First Amendment-இன் கீழ் சட்டச் சவால்களை எதிர்கொள்ளக்கூடும் எனக் கூறியுள்ளனர்.
இந்த விவகாரம் தொடர்பில் சட்ட நடவடிக்கைகள் இடம்பெறுமா என்பது அடுத்தகட்டத்தில் தெரியவரும்.
