யாழ்ப்பாணத்தில் பிறந்த கம்ஸி குணரத்னம் நோர்வேயின் புதிய போக்குவரத்து அமைச்சராக நியமிக்கப்பட்டுள்ளார்.
நோர்வே அரசாங்கம் கடந்த செப்டெம்பர் 11ஆம் திகதி மேற்கொண்ட அமைச்சரவை மாற்றத்தின் போது இந்த நியமனம் வழங்கப்பட்டுள்ளது.
1988ஆம் ஆண்டு யாழ்ப்பாணத்தில் பிறந்த கம்ஸி குணரத்னம், சிறுவயதில் தனது குடும்பத்துடன் நோர்வேக்குச் சென்றார். பின்னர் நோர்வே தொழிற்கட்சியான Labour Party ஊடாக அரசியலில் ஈடுபட்டார்.
2007ஆம் ஆண்டு தனது 19ஆவது வயதில் ஒஸ்லோ நகர சபைக்கு தெரிவான அவர், 2015 முதல் 2021ஆம் ஆண்டு வரை ஒஸ்லோவின் துணை மேயராக பணியாற்றினார். 2021ஆம் ஆண்டு நோர்வே நாடாளுமன்றமான Storting-க்கு தெரிவானதுடன், 2025ஆம் ஆண்டிலும் மீண்டும் தெரிவு செய்யப்பட்டார்.
புதிய போக்குவரத்து அமைச்சராக, சாலை, ரயில், பொதுப் போக்குவரத்து, விமானப் போக்குவரத்து, கடல் போக்குவரத்து மற்றும் தபால் சேவைகள் உள்ளிட்ட துறைகளுக்கான கொள்கைகளை அவர் கவனிப்பார்.
இதேவேளை, 2011ஆம் ஆண்டு நோர்வேயின் Utøya தாக்குதலில் உயிர் தப்பியவர்களில் ஒருவரான கம்ஸி குணரத்னம், இலங்கையின் நிலைமைகள் தொடர்பிலும் தொடர்ந்து கவனம் செலுத்தி வருகிறார்.
2026 பெப்ரவரி மாதம் நோர்வே நாடாளுமன்றத்தில் இடம்பெற்ற விவாதத்தின் போது, இலங்கையில் இடம்பெற்ற யுத்தம், யாழ்ப்பாணம் செம்மணி பகுதியில் கண்டெடுக்கப்பட்ட மனித எச்சங்கள் மற்றும் யுத்த காலத்தில் காணாமல் போனவர்கள் தொடர்பான விடயங்களையும் அவர் எழுப்பியிருந்தார்.
யாழ்ப்பாணத்தில் இருந்து நோர்வே அரசாங்கத்தின் அமைச்சரவை வரை கம்ஸி குணரத்னம் பயணித்திருப்பது, அவரது அரசியல் வாழ்க்கையில் முக்கியமான புதிய கட்டமாக அமைந்துள்ளது.
