இன, மத நல்லிணக்கம் மற்றும் போதைப்பொருள் ஒழிப்புக்கான அரசாங்கத்தின் வேலைத்திட்டங்களுக்கு இந்து குருமார்கள் ஆசீர்வாதம்
கொழும்பு, மட்டக்களப்பு, யாழ்ப்பாணம் மற்றும் மலையகத்தை பிரதிநிதித்துவப்படுத்தி வருகை தந்த இந்து குருமார்கள் குழுவினர், ஜனாதிபதி அநுர குமார திசாநாயக்கவை ஜனாதிபதி அலுவலகத்தில் சந்தித்து கலந்துரையாடினர்.
நாட்டில் கடந்த இரண்டு வருடங்களாக எந்தவொரு இனவாத மோதலுக்கும் இடமளிக்காமல், அனைத்து மக்களுக்கும் இடையில் சகவாழ்வு, சமாதானம் மற்றும் நல்லிணக்கத்தை உறுதிப்படுத்துவதற்காக ஜனாதிபதி தலைமையிலான அரசாங்கம் முன்னெடுத்து வரும் வேலைத்திட்டங்களுக்கு இந்து குருமார்கள் தமது ஆசிகளையும் ஆதரவையும் தெரிவித்தனர்.
அத்துடன், நாட்டின் எதிர்கால சந்ததியினரை பாதித்து வரும் போதைப்பொருள் பேரழிவை ஒழிப்பதற்காக அரசாங்கம் நடைமுறைப்படுத்தி வரும் வேலைத்திட்டங்களுக்கும் அவர்கள் தமது ஆசிகளை வழங்கினர்.
இனவாதத்திற்கு எதிராக மதத் தலைவர்களின் பங்களிப்பு
மதம் அல்லது கலாசாரத்தை அடிப்படையாகக் கொண்டு இனவாதத்தைப் பரப்புவதற்கு மேற்கொள்ளப்படும் எந்தவொரு முயற்சிக்கும் தாம் எதிர்ப்புத் தெரிவிப்பதாக இந்து குருமார்கள் தெரிவித்தனர்.
மதத்தின் ஊடாக முன்னெடுக்கப்பட வேண்டியது அனைவரிடமும் அன்பையும், நல்லிணக்கத்தையும் பகிர்ந்து கொள்வதே எனவும் அவர்கள் சுட்டிக்காட்டினர்.
போதைப்பொருள் ஒழிப்பு தேசியப் பொறுப்பு
போதைப்பொருள் பேரழிவுக்கு எதிராக அரசாங்கம் முன்னெடுத்து வரும் வேலைத்திட்டங்கள் தொடர்பிலும் சந்திப்பின்போது விரிவாக கலந்துரையாடப்பட்டது.
போதைப்பொருள் அச்சுறுத்தலை ஒழிப்பது எந்தவொரு தனிநபராலோ அல்லது நிறுவனத்தாலோ மாத்திரம் மேற்கொள்ளக்கூடிய நடவடிக்கை அல்ல எனக் குறிப்பிட்ட இந்து குருமார்கள், அது முழு சமூகமும் ஒன்றிணைந்து ஏற்றுக்கொள்ள வேண்டிய தேசியப் பொறுப்பு என வலியுறுத்தினர்.
இந்த தேசிய வேலைத்திட்டத்தை தொடர்ச்சியாகவும் வலுவாகவும் முன்னெடுத்துச் செல்வதற்கு சமூகத்தின் அனைத்து தரப்பினரதும் தீவிர பங்களிப்பு அவசியம் எனவும் அவர்கள் தெரிவித்தனர்.
இந்து குருமார்களுக்கான ஒருங்கிணைந்த பொறிமுறை
தேசிய முக்கியத்துவம் வாய்ந்த விடயங்களில் நாட்டின் பல்வேறு பகுதிகளிலும் வாழும் இந்து குருமார்கள் ஒன்றிணைந்து செயற்படக்கூடிய முறையான பொறிமுறையொன்றை உருவாக்கித் தருமாறும் இந்து குருமார்கள் ஜனாதிபதியிடம் கோரிக்கை விடுத்தனர்.
இதன் மூலம் இந்து அறநெறிப் பாடசாலைகளை நடத்துவது உள்ளிட்ட இந்து பக்தர்கள் எதிர்நோக்கும் பிரச்சினைகள் தொடர்பில் கலந்துரையாடி, அவற்றுக்குத் தீர்வுகளைப் பெற்றுக்கொள்ள வாய்ப்பு ஏற்படும் எனவும் அவர்கள் தெரிவித்தனர்.
இந்து மதத்தில் பல்வேறு மதப் பாரம்பரியங்கள், நம்பிக்கைகள் மற்றும் அடையாளங்கள் காணப்படுவதுடன், அதற்கு ஒற்றைத் தலைமைத்துவக் கட்டமைப்பு இல்லாத நிலையில் அதன் பன்முகத்தன்மையை ஒரே முறையில் ஒருங்கிணைக்க முடியாது என ஜனாதிபதி அநுர குமார திசாநாயக்க இதன்போது சுட்டிக்காட்டினார்.
எனினும், அந்த மத அடையாளங்களையும் பாரம்பரியங்களையும் பாதுகாத்துக்கொண்டு, பொதுவான சமூக நோக்கங்களுக்காக கூட்டாகச் செயற்படக்கூடிய குருமார்களின் ஒருங்கிணைந்த பொறிமுறையொன்றை உருவாக்குவது முக்கியமானது எனவும் ஜனாதிபதி தெரிவித்தார்.
இதன்படி, இந்து மதத்தின் பன்முகத்தன்மைக்கு மதிப்பளித்து, அனைத்துத் தரப்பினரதும் பங்களிப்புடன் பொதுவான சமூகச் செயற்பாடுகளை முன்னெடுப்பதற்குத் தேவையான வேலைத்திட்டத்தை ஜனாதிபதியின் சிரேஷ்ட மேலதிக செயலாளரின் பங்களிப்புடன் தயாரிக்குமாறு ஜனாதிபதி பணிப்புரை விடுத்தார்.
முக்கியஸ்தர்கள் பங்கேற்பு
இராமகிருஷ்ண மிஷனின் கொழும்பு நிலையப் பொறுப்பாளர் ஸ்ரீமத் சுவாமி அக்ஷராத்மானந்தஜி மகராஜ், சின்மயா மிஷனின் கொழும்பு நிலையப் பொறுப்பாளர் சுவாமி குணாதீத்தாநந்த சரஸ்வதி, பிரம்மசிரி எஸ். சிவநேசன் சர்மா, சத்தியசீலன் உமாகாந்த் சிவாச்சாரியார் உள்ளிட்ட இந்து குருமார்கள் மற்றும் ஜனாதிபதியின் சிரேஷ்ட மேலதிக செயலாளர் ரோஷன் கமகே உள்ளிட்ட பலர் இந்த சந்திப்பில் கலந்துகொண்டனர்.
