டி -20 உலக கிண்ண கிரிக்கட் தொடரில் இலங்கை மற்றும் நெதர்லாந்து அணிகளுக்கு இடையிலான போட்டியில் இலங்கை அணி 83 ஓட்டங்களினால் வெற்றியீட்டியுள்ளது.
நாணய சுழற்சியில் வெற்றிபெற்ற நெதர்லாந்து அணி முதலில் களத்தடுப்பில் ஈடுபட தீர்மானித்தது. அதனடிப்படையில் முதலில் துடுப்பெடுத்தாடிய இலங்கை அணி நிர்ணயிக்கப்பட்ட 20 ஓவர்கள் நிறைவில் 6 விக்கெட்டுக்களை இழந்து 201 ஓட்டங்களை பெற்றது.
டி- 20 உலகக்கிண்ண போட்டிகளில் 200 க்கும் அதிகமான ஓட்டங்களை பெற்ற இரண்டாவது அணியாக இலங்கை அணி தம்மை அடையாளப்படுத்திக்கொண்டது.
இலங்கை அணி சார்பில் குசல் மெண்டிஸ் 29 பந்துகளில் 46 ஓட்டங்களையும், ச்சரித் அசலங்க 21 பந்துகளில் 46 ஓட்டங்களையும் பெற்றுக்கொடுத்தனர்.
நெதர்லாந்து அணி சார்பில் பந்துவீச்சில் லொகான் வேன் பீக் 2 விக்கெட்டுக்களை வீழ்த்தினார்.
அதற்கமைய 201 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய நெதர்லாந்து அணி 16.4 ஓவர்கள் நிறைவில் சகல விக்கெட்டுகளையும் இழந்து 118 ஓட்டங்களை மட்டுமே பெற்றுக்கொண்டது.
அதனடிப்படையில் இலங்கை அணி போட்டியில் 83 ஓட்டங்களால் வெற்றி பெற்றுள்ளது.
பந்து வீச்சில் இலங்கை அணி சார்பாக நுவன் துஷார 24 ஓட்டங்களுக்கு 3 விக்கெட்டுக்களை வீழ்த்தினார். வனிந்து ஹசரங்க மற்றும் பத்திரன ஆகியோர் தலா இவ்விரண்டு விக்கெட்டுக்களை கைப்பற்றினர். இலங்கை அணியானது டி 20 உலக கிண்ண கிரிக்கட் தொடரில் ஆறுதல் வெற்றியை பதிவுசெய்துள்ளது.
போட்டியின் ஆட்டநாயகனாக ச்சரித் அசலங்க தெரிவுசெய்யப்பட்டார்.
